P1.5 M balor sa sunog sa Toledo

CEBU, Philippines -  Gibana-banang moabot og P1.5 milyones ang danyos sa miigong sunog sa duha ka mga establisamento apil na mga panimalay sa Macapagal Highway sa barangay Poblacion siyudad sa Toledo niadtong Sabado sa alas 4:25 sa hapon.

Matud pa ni PO3 Roel Tadique sa Toledo City Police dihang nahinabi sa Banat News, ang nasunog nga mga establisamento mao ang Lucky Town General Merchandise, gipanag-iya sa usa ka Stephen Chong ug Guilmar Gatcho ug ingon man ang Marygold Pharmarcy nga gipanag-iya ni Dr. Edwin Yu.

Apil sa nasunog ang pipila ka mga panimalay nga sikbit sa maong mga establisamento nga padayon pa karung gihimo-an og dugang pakisusi sa mga sakop sa kabomberohan sa maong dakbayan.

Matud ni PO3 Tadique nga nadawat nila ang alarma sa sunog alas 4:25 sa hapon ug pagka alas 5:45 kapin sa oras ang nilabay hingpit nakontrolar human gipaubos sa general alarm.

Subay sa imbestigasyon dunay nabatiang buto gikan sa bodega sa ikaduhang andana sa Lucky Town General Merchandise ug paglabay sa pipila ka gutlo miulbo na ang kalayo.

Padayon pa ang imbestigasyon sa kabumberohan pagtino sa hinungdan sa maong sunog, gisuwayan unta pagtawag sa Banat News makadaghang higayon ang telepono sa Toledo City Fire Department nga 467-9115 gikan pa niadtong Sabado sa gabii hangtud kagahapon sa udto apan dili makontak ang maong numero. - BANAT NEWS