Nasaypang kontra giluba

CEBU, Philippines – Usa ka gwardiya sa pantalan ang gipasanginlang nakadunggab sa usa ka lalaking nasaypang kaaway dihang nahitabo ang kagubot sulod sa Pier 3 Arellano Blvd. barangay Tinago kagahapon sa kaadlawon. Ang maong wala mailhing gwardiya giingong sakop sa Kampilan Security Agency nga nag-duty niadtong tungura sa entrance sa maong pantalan apan nakaeskapo. Ang nadunggaban giilang si Lorenzo Maglinte Jr., 29, usa ka scavenger nga taga barangay San Roque. Nasayran nga nakig-inom sa mga higala daplin sa karsada ang biktima ug nangihi kini niadtong higayuna dihang giduol sa gwardiya ug giduslak og Batangas Knife sa bukton. Matud pang SPO4 Alex Dacua sa Homicide Section sa sayo pa niana, gikatahong naapil sa kagubot ang maong gwardiya apan nakadagan ang kaaway niini ug ang biktimang nangihi maoy iyang naabtan ug gidunggab. – Lesley Caminade (BANAT NEWS)