Ulo sa motorista nalatayan sa trak sa gobiyerno patay
CEBU, Philippines – Napisat ang ulo sa usa ka lalaki human kini maligsi niadtong milabay’ng hapon sa usa ka trailer truck nga gipanag-iya sa Japan International Cooperative Agency nga gidonar ngadto sa Cebu Provincial Government diha sa highway sa barangay Pitago lungsod sa Consolacion.
Ang namatay giilang si Manolito Perez, molupyo sa barangay Jugan, wala na madala sa tambalanan gumikan sa kagrabe sa kadaut sa iyang ulo dihang nalatayan sa ligid sa maong trak.
Ang drayber sa maong trak giilang si Alberto Hermoso Gingco, 62, molupyo sa sitio Cogon lungsod sa Carmen nga boluntaryo dayong mitahan ngadto sa kapolisan human sa aksidente.
Sumala pa sa kapolisan ang biktima luwan sa iyang motorsiklo niadtong tungura padulong sa dakbayan sa Sugbu dihang pag-abot sa maong dapit aksidenteng na-slide ang motorsiklo gumikan sa bangag diha sa dalan.
Dihang natumba kini nalatayan kini sa maong trak diha sa ulo hinungdan sa hinanali niyang kamatayon lakip sa nagupok ang iyang motorsiklo nga napasok sa ilawom.
Gikatakdang pasakaan og kasong Reckless Imprudence Resulting on Damage to Property with Homicide ang nahisgutang drayber. – Lesley Caminade (BANAT NEWS)
- Latest
- Trending
