Managtiayon gipatay sa silingan

CEBU, Philippines – Gumikan sa lalis sa utlanan sa yuta ug basurang gipataka og labay, gipusil patay ang magtiayon sa ilang silingan diha sa Mactan Proper dakbayan  sa Lapulapu kagahapon sa buntag.

Ang mga biktima mao sila si Lyndon Soon, 45 ug ang iyang asawang si Maria Melinda Soon, 44, mga residente sa maong dapit samtang ang gitumbok nga responsable sa maong krimen mao si Isaac Orindain, 39, minyo.

Ang ginang nga biktima gikatahong mihangyo pa sa suspek nga di apilon ang pagpusil ang ilang 17-anyos nga anak nga daling migawas sa panimalay atol sa pagbuto-buto.

Base sa pasiunang imbestigasyon ni SPO2 Roelito Jumao-as sa Crime Against Persons (kanhi Homicide ) sa Lapulapu nasuta nga duna nay daang panagsungi ang magtiayong Soon ug si Orindain gumikan sa boundary sa ilang yuta, mga lote nga sikit kaayo sa gitukod nilang mga balay.

Apan misamot ang ilang panagbikil kagahapon sa buntag human nga nakit-an ni Orindain nga dunay basurang gilabay sa likod sa ilang panimalay hinungdan nasuko kini.

Gumikan niini nagkakomprontase ang duha apan wala makabantay ang magtiayong Soon nga armado sa kalibre .38 si Orindain ug kalit silang gipamusil niini tumong sa ilang mga dughan.

Gidali og dala sa tambalanan ang magtiayong Soon apan si Melinda gideklarar nga patay na samtang usa ka oras ug tunga ang milabay sa pagsuway pagluwas sa kinabuhi ni Lyndon nakabsan usab kini sa kinabuhi sa Mactan Doctors Hospital.

Pakyas pagsikop ang kapolisan kang Orindain tungod kay dali kining nakabiya sa ilang panimalay human sa nahitabong krimen.

Sumala pang Jumao-as ang anak sa duha mibutyag nga parehong nangandam alang sa trabaho ang mga biktima, ang iyang amahan diha sa gawas ug miandam sa iyang motorsiklo dihang miabot ang suspek sa ilang tugkaran dayong namusil.

Matud pa sa anak nakadungog pa sila sa iyang amahan nga misinggit nga nangayo og tabang hinungdan nga daling migawas ang iyang inahan apan gisugat gihapon kini og pusil sa suspek.

Ang batan-on nagkanayon nga gimandoan dayon siya sa iyang inahang samaron nga di nalang palahuson og gawas ug gihangyo niini ang suspek nga di lang siya (anak) apilon.

Giingong sa milabay’ng adlaw gihagit sa suspek og buno ang iyang amahan nga nagdala-dala og pana sa isda apan wala kini tubayi sa iyang amahan ug gisumbong nalang hinuon kini ngadto sa barangay hall.

Gikatakda untang mag-atubang ang ilang pamilya ug sa suspek sa sunod semana kabahin sa kagubot sa ilang utlanan. – BANAT NEWS