CEBU, Philippines – Napulo ka adlaw ang gihatag kang Mayor Jonas Cortes sa Ombudsman Visayas alang sa pagtubag sa gipadangat nga reklamo nga kapakyas sa pagluwat sa P500,000 nga subsidy sa kagamhanan alang sa Mandaue City College nga giumol pinaagi sa ordinansa sa dakbayan.
Ang kamandoan nga giluwatan ni Visayas Ombudsman Director Virginia Palanca Santiago base usab sa gipadangat nga reklamo sa mga magtutudlo sa MCC nga gipangulohan ni Dr. Paulus Marie Cañete nga wala sila makadawat sa ilang suweldo sukad pa niadtong 2006 hangtod 2009. Gisukip sa maong kamanduan ni Santiago ang sulat gikan sa Department of Budget and Management (DBM) ngadto kang Dr. Cañete nga nagtugot sa executive department sa pagpagawas sa subsidy nga salapi sa lokal nga kagamhanan alang sa maong tulunghaan.
Sa nasayran nga si Dr. Elmer Repalda nga maoy presidente sa kahugpongan sa mga magtutudlo sa MCC sa Jagobiao Campus nga gipangulohan ni Cañete misang-at og reklamo sa Ombudsman Visayas batok kang Mayor Cortes. Ang MCC nga gipangulohan ni Cañete wala ilha sa mayor sa dakbayan sanglit ang iyang giila mao man ang MCC sa Mandaue City Sports Complex nga gipangulohan usab ni Dr. Susana Cabahug. – Romeo T. Limpangog (BANAT NEWS)