Mag-uyab gitulis; 2 nasikop

CEBU, Philippines – Nasikop atol sa hot pursuit operation sa kapolisan sa Station 4 sa Mandaue ang duha ka tulisan nga mitulis sa manag-uyab sa dalan H. Cortes, barangay Casuntingan dakbayan sa Mandaue kagahapon sa kaadlawon.

Ang nasikop mao sila si Jury Salgado, 25, ulitawo ug JLM (Jesus Loves Me) Quilomquilom, 18, ulitawo, mga residente sa Sitio Marfa, barangay Bakilid dakbayan sa Mandaue.

Samtang ang mga biktima mao sila si Limneo Quieta III, 31, ulitawo, residente sa Ponce Compound sa barangay Capitol, dakbayan sa Sugbu ug ang uyab niini nga si Ammabellelizabeth Tita Olga Moro, 30, dalaga ug residente sa Esteban Compound barangay Maguikay, dakbayan sa Mandaue.

Base sa imbestigasyon ni PO3 Rey Manatad sa Station 3 sa MCPO nasayran nga mga alas 12:30 kagahapon sa kaadlawon samtang mihunong sa ilang motorsiklong gisakyan ang manag-uyab sa usa ka hilit nga dapit alang sa sugo sa lawas ni Quieta duha ka mga lalaki ang miduol niini.

Samtang nagpaabot si Moro sa ilang motor iyang nakita nga gitionan na ang iyang uyab sa kalibre .38  rebolber dayong deklarar nga tulis ngadto kanila.

Walay nakuha gikan kang Quieta apan si Moro gumikan sa kahadlok nga sila pusilon hinungdan napugos na lang siya sa paghatag sa iyang cell phone ngadto sa mga tulisan dayong pahilayo sa maong dapit dala ang pagpabuto sa ilang armas aron dili kasunod ang mga biktima.

Ang mga biktima mitaho dayon sa kapolisan sa Station 4 hinungdan nga mihimo dayon kini og hot pursuit operation pinangulohan sa ilang hepe nga si Insp. Rolan Aleser.

Atol sa ilang pagpatrolya ilang nasigpatan ang duha sa susamang dapit hinungdan ila kining nasikop ug nakuha pagbalik ang cellphone nga iya sa biktima.

Lakip sa nakuha sa duha ka tulisan mao ang armas nga kalibre .38 nga rebolber nga adunay upat ka buhing bala ug usa ka kabhang nga gituohang mao kadtong gipabuto.

Giawhag usab ni PO3 Manatad ang mga biktima sa pagpanulis habig sa H. Cortes sa dakbayan sa Mandaue aron maila kun mao bay responsable sa mga tulis sa maong dapit. – Bong Soriano (BANAT NEWS)