CEBU, Philippines – Nahimong tensyonado ang session sa Konseho sa lungsod sa Alegria niadtong Miyerkules sa buntag ug gibantayan pa kini og mga polis human misuway og babag ang minoriya sa gidusong sobra sa P2 milyones nga supplemental budget ni Mayor Raul Guisadio.
Ang municipal Planning Officer sa Alegria, Tito Cavalida mibutyag sa Banat News nga milanat og sobra sa tulo ka oras ang sesyon una pa naaprubahi ang maong supplemental budget.
Ang maong supplemental budget gitagana alang sa mga proyekto sa lungsod karung tuiga, mga benipisyo sa mga kawani sa lungsod ug ingon man sa P200 mil nga gahin nga pundo sa turismo.
Gisukit-sukit og maayo sa minoriya pinangulohan sa presiding officer ug Bise Mayor Gilberto Magallon ang maong supplemental budget ilabina ang P200 mil nga gahin sa turismo.
Ang budget sa turismo maoy hinungdan nganong wala ka-aprobahi ang maong supplemental budget sa milabay nilang sesyon niadtong miaging mga semana human nisampot sa personalay ang lantugi tali sa sakop sa minoriya ug mayoriya.
Matud pa ni Cavalida nga human sa taas taas nga oras nga lantugi og pagsukit-sukit sa minoriya hingpit ra gihapong na-aprubahan ang maong supplemental budget human nakombinsir ang mayoriya sa konseho apil na ang pipila ka konsehal sa oposisyon sa kamahinungdanon niini.
Si Mayor Guisadio sa iyang bahin mipasabot sa kamahinungdanon sa maong gahin nga maoy gisaligan aron mapatuman ang mga nakahan-ay nilang proyekto sa lungsod karung tuiga ug aron mahatag ang mga binipisyo sa mga kawani.
Samtang gipasabot sa mayor nga ang P200 mil nga gahin sa turismo gitumong kini aron makaapil ang lungsod sa Alegria sa “Pasigarbo sa Sugbo” nga usa ka buwang selebrasyon sa Kapitolyo karung bulan sa Agosto. – Darrel Carumba (BANAT NEWS)