CNCRP prayoridad ni Arroyo - Esperon

CEBU, Philippines – Paghuman sa proyekto sa Cebu North Coastal Road Project kon (CNCRP) karong tuiga maoy dakong prayoridad ni Presidente Gloria Macapagal Arroyo.

Kini ang giluwatang pamahayag ni Presidential Management Staff Sec. Hermogenes Esperon atol sa pagbisita sa CNCRP sa barangay Paknaan dakbayan sa Mandaue, kini mao ang proyekto magkutay ngadto sa barangay Cansaga lungsod sa Consolacion.

Kahinumduman nga labihang sukoa ni Arroyo kaniadto gumikan sa kalangay sa maong proyekto atol sa iyang pagbisita pipila na ka buwan ang nakalabay gumikan kay dugay kaayo kining nahuman.

Uban ni Esperon si DPWH Under Secretary Engr. Pay Yabut, MCDP Project Director Engr. Nilo Pamaylaon, DPWH 7 Regional Director Engr. Josefino Rigor, Mandaue City Mayor Jonas Cortes ug Consolacion Mayor Avelino Gungob nga maoy personal nga mitan-aw sa kalambuan sa maong proyekto.

 Matud pa ni Esperon bisan pa nga ang target date sa paghuman sa maong kinatibuk-ang proyekto sa umaabot pa nga bulan sa Agosto tuig 2010 apan gusto ni Arroyo nga sa bulan sa Disyembre ning tuiga mahuman na ang maong proyekto ug operational na kini.

Si Engr. Pamaylaon mipadayag nga sa pagkakaron 55 porsiyento na ang nahuman ug base sa iyang pakighinabi sa Ceriaco Corp. ang kontraktor 24-oras matag adlaw ang ilang gihimo.

Si Usec. Yabot nagkanayon nga si Arroyo mimando na sa pagpagawas sa pundo nga 350 milyones alang sa CNCRP.

Sumala pa sa duha ka mayor nga nabulahan sa maong proyekto nga ang katumanan sa maong proyekto maoy kasulbaran sa matag adlaw nga problema nila sa trapiko.

Ang 6.5 kilometrong CNCRP gigahinan og P2.4 bilyones, duna kini tulay nga may gilapdong 15 metros nga nagsumpay sa Paknaan dakbayan sa Mandaue ug Cansaga sa Consolacion ug lahos na kini ngadto sa lungsod sa Liloan. – Bong Soriano (BANAT NEWS)