CEBU, Philippines – Namatay ang usa ka supervisor human mabuak ang ulo niini dihang naligsan sa nag- hit and run nga sakyanan didto sa highway sa barangay Cayang ug eskina Pulangbato sa lungsod sa Bogo, niadtong Martes sa gabii, atol sa bagyong Feria.
Ang biktima mao si Juan Moral Jr., 30, minyo, nga taga lungsod sa Argao ug supervisor sa Taytay Kauswagan Incorporated Micro Finance.
Si PO3 Ramonito Canja sa Bogo Police Station mibutyag sa Banat News nga ang biktima nagsakay sa iyang motorsiklo paingon sa Medillen gikan sa Poblacion, Bogo, dihang pag-abot niya sa maong eskina na-slide ang iyang motorsiklo.
Maayong pagkalagpot sa biktima ug sa pagtugpa niini sa karsada mao usay paglabay sa nagbagiyos nga awto nga milatay sa iyang lawas.
Nakita sa nakasaksi sa hitabo nga misirit gyud og padagan ang nakaligis nga sakyanan ug wala gyud mohunong busa wala kakuhai og plate number.
Gihatod sa mga nakasaksi ang maong biktima ngadto sa Vicente Verallo District Hospital sa Bogo diin didto gideklarar nga patay na kini
Padayon pang giimbistigar sa kapolisan ang maong hitabo. – Darrel A. Carumba (BANAT NEWS)