1 sa 4 ka tulisan nasikop

CEBU, Philippines – Usa sa upat ka ex-convict nga tulisan nasikop sa kapolisan dihang ang natulis nila sulod sa jeep nga pasaheroan usa diay ka anak og polis didto duol sa Antonio Hotel sa Natalio Bacalso Avenue, barangay Mambaling , dakbayan sa Sugbo kagahapon sa alas 10:00 sa buntag.

Si SPO3 Socrates Bacalso sa Punta Police Station miila sa suspetsadong nadakpan nga si Edwin Flores, 36, taga Sitio Tuburan, barangay Punta Princesa, samtang ang mga kauban niining wala pa hidakpi mao sila si Mario Deco, taga Punta Princesa gihapon, Arman Bukog ug Edward Bundialo, pulos taga lungsod sa Liloan ug ang upat pulos mga ex-convict.

Samtang ang ilang gitulis mao si Simplicio Mantella III, 18, taga Suba Pasil, dakbayan sa Sugbo nga anak og usa ka polis ug nakuhaan og necklace sa mga tulisan.

Si Sr. Supt. Patrocinio Comendador, hepe sa kapolisan sa dakbayan sa Sugbu mibutyag nga ang nakadakop kang Flores mao si SPO1 Alejandro Batobalanos.

Didto kini hidakpi sa Sitio Tambisan, Labangon -Tres human sa follow-up operation sa taga Punta Police Station kagahapon sa alas 12:00 pasado sa udto.

Matud pa ni Comendador nga ang alahas ug ice pick maoy nasakmit gikan kang Flores, samtang ang usa ka granada didto na makuha sa kapolisan sa usa ka payag diin kini ibilin sa maong mga suspetsado.

Gibutyag ni Comendador nga ang mga suspetsado misakay sa jeep nga gisakyan usab ni Mantella dihang sa pag-abot sa nahisgutang dapit mideklarar kini og tulis uban sa pagtion og armas nga .357 revolver ug ice pick, ngadto sa biktima, samtang ang laing tulisan nagbitbit usab og granada ug mihulga pa nga pabuthon nila sulod sa jeep kun may moreklamong pasahero. – BANAT NEWS