Hubog nga nangulata gikiha

CEBU, Philippines – Gipasakaan na kagahapon og kasong attempted homicide ang usa ka 32-anyos nga lalaking parolado nga gipasanginlang nangulata niadtong Domingo sa gabii diha sa Urban Poor, sitio Kalinaw Lower, sa barangay Maghaway dakbayan sa Talisay.

Ang suspetsado mao si Francisco Labiaga, residente sa nahisgutang lugar kinsa giingong hubog ug mikulata kang Edwin Sipsip, 41, taga sitio Plus, barangay Inayawan, dakbayan sa Sugbo.

Si Vilma Sahur, office clerk sa Talisay City Prosecutor mibutyag sa Banat News nga kagahapon sa buntag gipasaka na ang nahisgutang kaso batok kang Labiaga.

Matud niini nga sa milabay'ng mga tuig si Labiaga ang napasakaan og kasong arson human niya unaya sa pagsunog ang balay sa iyang mga ginikanan nga diin nabilanggo kini apan nahatagan og parole.

Sa imbestigasyon sa kapolisan giingong mibisita si Sipsip diha sa balay sa iyang bilas sa nahisgutang dapit apan nasugatan niini ang suspek ug walay daghang pangutana kalit nga gidabu-dabuhan og kulata si Sipsip.Si Sipsip ang nakaangkon og mga bun-og sa lawas ug gani ang nawong niini nanghuboy ug napikot ang mga mata, ang iyang bilas na maoy mitawag og mga polis ug miresulta sa pagkasikop sa suspek. – Brenda Batuto (BANAT NEWS)