Gihapak sa balod

CEBU, Philippines – Dul-an usa ka libong pasahero gikan sa nagkadaiyang pantalan sa Sugbo nangatanggong paghapak sa bagyong Feria kagahapon nga nagdala og kusog nga hangin ug ulan. Kapin usab sa 50 ka barkong ubos sa 1000 gross tonnage ang wala tuguting makabiyahe gumikan sa kamandoan sa Philippine Coast Guard.

Ang Office of Civil Defense ug Regional Disaster Coordinating Council (RDCC) pinaagi sa operations officer nga si Neil Sanchez dihang nahinabi sa Banat News nagkanayon nga sukad kagahapon sa udto wala pa silay nadawat nga report nga kadaut gikan sa mga probinsya sa Central Visayas. Upat ka mga coastal barangays sa siyudad sa Sugbu ang gipanghapak sa kusog nga mga balod kagahapon ug giabot sa tubig   ang Ermita, Pasil, Suba ug Sawang Calero nga gilapawan sa tubig-dagat ang ilang seawall, dike o riprap hinungdan nga nasanapan.

Ang Cebu City Disaster Coordinating Council (CCDCC) wala hinuon mopabiya sa mga lumolupyo tungod kay nibahar ra usab ang tubig atol sa paghunas sa dagat.

Gawas niini ug sa gikatahong mga kahoy nga nangatumba sa barangay Malubog wala nay laing mga panghitabo nga na-monitor kagahapon ang CCDCC.

Samtang ang Mines and Geo-Sciences Bureau (MGB-7) mipahibawo na usab sa mga bukirang barangay sa dakbayan nga delikado sa landslide sama sa Lusaran, Binaliw, Guba, Budlaan, Malubog, Buot-Taup, Busay, Sirao, Taptap, Tagbao, Tabunan, Pong-ul Sibugay, Sudlon 1, Sudlon II ug barangay Sinsin.

Usa ka emergency meeting ang gipatawag ni Governor Gwendolyn Garcia sa Cebu Provincial Disaster Coordinating Council kini alang sa pag-activate sa ilang 24-oras disaster preparedness tungod sa maong bagyo.

Ang tanang mga department heads sa Kapitolyo gimanduan nga mapulipuli sa pagbantay sa monitoring sa Kapitolyo sulod sa 24 oras aron makapadala dayon og heavy equipment gikan sa Cebu Provincial Engineering kung gikinahanglan.

Wala hinuoy nareport nga aksidente pagdahili sa yuta o mga nalunod nga bangka dinhi sa lalawigan. Lakip sa gipaalerto ang tanang municipal ug City Disaster Coordinating Councils aron makaresponde dayon sa katalagman.

Ang kapolisan ug 78th IB mipadayag usab og kaandam sa pag-abag kung gikinahanglan.

Si Dr. Aden Monisit ang Division School Superintendent sa DepEd-7 mimando sa pagkanselar sa klase sa elementarya ug sekondarya gumikan sa kakusog sa ulan sa amihanang bahin sa Sugbu inubanan sa kusog nga hangin.

Apan dinhi sa dakbayan pipila sa mga prep-schools ang mikanselar sa ilang klase alas-7 palang sa buntag gumikan sa kapeligro sa panahon alang sa mga bata.

Gipaubos sa tropical storm signal number 1 ang tibuok Sugbo sukad kagahapon sa alas 11:00 sa buntag tungod sa bagyong Feria.

Gibutyag ni Alex Padin, weather forecaster sa PAG-ASA Mactan dihang nahinabi sa Banat News nga ang naapektahang mga lugar dinhi sa Visayas Areas mao ang Samar Provinces, Leyte ug Biliran Island samtang ang mga lugar sa Luzon area nga ubos sa signal number-2 mao ang Masbate, Ticapo Island, Sorsogon ug Albay.

Ang mga lugar nga gipaubos sa Signal number-1 dinhi sa Visayas naglangkob sa Southern Leyte, Camotes, Bohol, Northern Negros, Capiz, Iloilo, Aklan ug Cebu samtang sa Luzon area ang mga lugar ubos sa signal number one mao ang Camarines provinces, Southern Quezon, Catanduanes, Burias Island, Romblon ug Marinduque.

Ang bagyong Feria nasigpatan sa coordinates nga 11.3 north ug 126.4 east og nagdala sa unos nga 80 kilometer per hour. – BANAT NEWS