Waste management sa Boracay sundogon sa Malapascua

CEBU, Philippines – Buot ang kadagkuan sa Department of Tourism sa kauluhan nga sundogon sa isla sa Malapascua, lungsod sa Daanbantayan ang paagi sa paghipos sa basura sa isla sa Boracay.

Kini ang tuyo sa DOT sa pagpadala kang Glenn Sacapaño, operations manager sa Boracay Solid Waste Management Action Team, sa isla sa Malapascua aron ikapaambit ang ilang kasinatian sa paghipos sa basura.

Si Sacapaño mao ang kanhi barangay kapitan sa Balabag, usa sa tulo ka barangay sa isla sa Boracay nga sakop sa Malay, Aklan.

Niadtong siya pa ang kapitan sa ilang barangay maoy pagsulod sa ayuda sa DOT aron masulbad ang nigrabeng suliran sa basura sa isla sa Boracay.

Ang DOT nibutang og P1.7-milyones alang sa pagpatukod sa Materials Recovery Facility sa isla sa Malapascua lakip na sa mga trainings ug educational campaign alang sa mga residente ug sa mga establisamento sulod sa usa ka tuig.

Matud pa ni Sacapaño nga sa pagkakaron, ang tanang basura sa ilang lugar napahimuslan na sa katawhan ug nahimo pa nga pangwartahan sa katawhan pinaagi sa mga produkto nga ilang nahimo gikan sa basura.

Base sa nakita ni Sacapaño sa isla sa Malapascua, tuldok lang ang basura itandi sa ilang nasinati sa isla sa Boracay niadtong tuig 1999 hangtod sa tuig 2004 sa wala pa nitabang ang DOT.

Si Kapitan Rex Novabos sa barangay Logon, isla sa Malapascua nadasig kaayo sa gipaambit sa sama niyang barangay kapitan usab ug nipasalig nga suportahan ang proyekto sa DOT nga nagpadayon na sa pagkakaron.

Ang Coastal Conservation and Education Foundation (CCEF) maoy gitugyanan sa DOT sa pagpatuman sa proyekto. – Gregg M. Rubio (BANAT NEWS)