Mastermind Impluwensiyado

CEBU, Philippines – Nagduda ang anak sa magtiayong koronel ug abogadang Arada nga gipa-ulanan og mga bala samtang nagharay-haray sa payag sa Manila Rubber Corporation (MRC) building niadtong Sabado sa gabii nga posibleng dakong tawo ang mipaluyo sa pagpusil patay sa iyang ginikanan.

Ang anak sa magtiayon nga wala magpaila mibutyag sa kapolisan nga posibleng katrabaho ra sa iyang ginikanan ang mipaluyo sa pagpapatay niini ug gisugo lang sa pagpapusil ang duha ka guwardiya. Mao kini karon ang giimbestigahan sa kapolisan sa Naga.

Miumol na og "Task Force Arada"ang Police Regional Office (PRO-7) nga maoy motutok sa kasong pagpusil patay nila ni Atty. Mary Jane Arada ug bana niining retiradong koronel sa Philippine National Police nga si Francisco Arada.

Ang maong Task Force Arada giumol human gimando ni PRO-7 Chief Supt. Lani-O Neres human ang magtiayong abogada ug retiradong koronel gipamusil sulod sa ilang panimalay niadtong Sabado sa gabii diha sa Cebu New Town barangay Cantao-an, lungsod sa Naga.

Ang "Task Force Arada" pagalangkuban sa Regional Intelligence Division (RID) nga maoy mangulo sa task force Criminal Investigation and Detection Group (CIDG-7), Regional Investigation and Detective Managements Division (RIDMD), Regional Security Agency and Guards Supervisory Units (RSAGSU-7), PNP-Crime Laboratory-7 ug Cebu Provincial Police Office (CPPO).

Si Sr. Supt. Jesus Gacquing, direktor sa CPPO, mibutyag nga siya mismo mihangyo ni Chief Supt. Neres nga magpatabang sa uban nga unit sa kapolisan.

Kini human usab si Atty. Arada dunay 'dying declaration' sa mga imbestigador sa kapolisan sa Naga dihang naabot kini sa South General Hospital.

Si Gacquing nagtuo nga kadtong dying declaration ni Atty. Arada dako kaayo'g gamit unya sa ilang imbestigasyon batok sa duha ka security guard nga sila si Rodynas Danding ug Rachel Omawan nga mga sakop sa Janthro Security Agency nga nakabase sa Manila. Apan ang duha nagbantay sa Manila Rubber Corporation Building diha sa barangay Cantao-an, Naga.

Samtang lantawon usab nila sa imbestigasyon ang mga gikasuhan nga mga security guard ug ang agency niini. Apil sa ilang imbestigahan ang kasong gipasaka ni Atty. Arada sa mga opisyal sa Philippine Economic Zone Authority (PEZA).

Hinuon ang duha ka mga security guard nga sila si Danding ug Omawan nadakpan human sa maong pagpamusil ug gitanggong na karon samtang gihikay pa ang tukmang kaso batok nila.

Si Mayor Valdemar Chiong sa lungsod sa Naga miingon nga "isolated case" lang ang nahitabo sa magtiayong Arada ug dili kini maka-apekto sa order sa lungsod.

Mibutyag si Chiong sa pakighinabi sa Banat nga iyang pagduda nga sulod ra sa trabaho ang relasyon sa pagpatay."

Dugang pa ni Chiong nga dili lang usab siya magpataka og estorya kay basin unya og makahatag siya og wrong information sa katawhan apan hugot ang iyang pagtuo nga ang iyang kapolisan nagsige og lihok aron masulbad og dali ang kaso. – BANAT NEWS