Lima ka tindahan gisirhan

CEBU, Philippines – Labing minos lima ka mga balay patigayon sa dakbayan sa Sugbu ang gipangkandaduhan sa mga sakop sa demolition team sa siyudad kagahapong adlawa.

Kini tungod sa kapakyas sa maong mga establisamento pagbayad og buhis sa City government ingon man paglukat ug pag-renew sa ilang business permits samtang ang uban peke ang mga business permits.

Matud sa labaw sa tax mapping division, Nanette Sungahid, nga maablihan lang ang maong mga balay patigayon kung malibkas na ang closure order niini.

Giklaro ni Mayor Tomas Osmeña nga ang mahinungdanon alang kaniya mao ang pagbayad og buhis sa nagkadaiyang mga establisamento ug dili niya prayoridad ang pagtuman niini sa gikinahanglang mga rekisitos.

Samtang buot ni Councilor Joey Daluz nga ipa-blacklist ang mga negosyanteng wala mobayad og buhis partikular na niadtong mga magpapatigayon nga nikalit lang pagpanira sa ilang mga balay patigayon nga wala mananghid sa City Hall.

Nasayran nga ubay-ubay nga mga closure order ang wala ma-serve niadtong miaging semana tungod kay nausab ang business name sa mga hingtungdan.

Ang mga sakop sa tax mapping division uban sa mga sakop sa demolition team sa siyudad nakugang na lang kay lahi na ang pangalan sa pipila ka establisamento.

Matud pa ni Daluz nga mahimo gihapong pasirad-an ang maong mga establisamento kung masuta nga usa ra ang tag-iya niini.

“Supposedly mo-retire gyud sila, if there is no retirement of their business unya makit-an nato nga lain na ang business name dayon mahibaw-an nato nga the same owner ra, they should be closed also,” sumala ni Daluz.

“I-blacklist nato ang owner, kung mo-open siya og bag-ong negosyo sa siyudad dili siya mahatagan og business permit hangtud mabayran iyang obligasyon,” dugang pa ni Daluz. – Elly Bolonos (BANAT NEWS)