CEBU, Philippines – Adunay gi-isolate nga 21 ka mga tinun-an sa Maritime Department sa University of Cebu Lapulapu-Mandaue gikan sa 600 ka mga kadeteng gi-quarantine sukad pa niadtong Hunyo 20 human mopakita og sintomas sa flu virus.
Gikatahong 19 kanila ang gibuwag na sa ubang tinun-an, samtang ang usa gikatahong gihilantan ug nagsuka ug gidala sa usa ka pribadong tambalanan samtang ang usa nasakit og chicken pox.
Kagahapong adlawa dunay walo kanila ang gipanghilantan ug pulos na usab gipangkuhaan og swab samples aron ipasusi sa Vicente Sotto Memorial Medical Center alang sa Collaborative Molecular Laboratory test.
Matud pa sa Department of Health-7 sa pagkakaron dunay 16 ka mga pending nga mga swab test sa maong laboratoryo, ang maong laboratoryo maka-detect sa mga swab samples kun duna kini virus apan wala kini dayon magpasabot nga A(H1N1) na kini sanglit duna may ubang flu virus nga gitawag og seasonal flu.
Ang mogawas nga positibo sa test sa VSMMC, ipadala ang swab sample ngadto sa Research Institute for Tropical Medicine sanglit kini ra maoy dunay primer sa A(H1N1) virus nga maka-detect sa maong bag-ong sakit.
Gawas sa mga swab sample sa mga tinun-an duna pay laing duha ka mga pending nga kasong gisusi sa VSMMC nga giingong positibo sa flu virus apan ipadala pa kini ngadto sa RITM.
Niadtong milabay'ng semana tulo ka kadeteng scholar sa Norwegian Ship Owners Association ang nasakit ug nasutang positibo sa maong virus hinungdan nga gipasirad-an dayon sa tag-iya ang maong unibersidad.
Sa report sa ABS-CBN Central Visayas kagahapon, si Atty. Agusto Go, presidente sa University of Cebu mibutyag nga gipa-ehersisyo nila ang mga kadeteng wala masakit.
Kini aron mas mapalig-on pa ang ilang mga resistensya batok sa maong sakit.
Samtang naukay ang mga residente diha sa Airmen Village sa sulod sa Mactan Benito Ebuen Air Base sa dakbayan sa Lapulapu human usa ka dalaga ang nasakit ug nagpakita sa susamang mga sintomas sa A(H1N1) virus.
Apan human mahiling nila Dr. Rodolfo Berame ang City Health Officer sa dakbayan sa Lapulapu nasutang tonsilitis ra ang sakit niini.
Si Berame nga nahinabi sa Banat News nagkanayon nga nagpakita og sintomas ang maong pasyente susama sa maong sakit ug mitaas ang temperature sa lawas niini gikan sa 38 ngadto sa 39 degrees Celsius.
Matud pang Berame gumikan sa tonsilitis mihubag og maayo ang tutunlan niini apan sa dihang ilang gihatagan og tambal mikalma ang hilanat sa maong dalaga.
Sa pagkakaron wala pay bisan usa ka kaso sa maong sakit sa maong dakbayan ug nagpadayon ang ilang kampanya pinaagi sa pagsabwag og impormasyon sa publiko kun unsaon paglikay ang maong sakit. – Uban sa report ni Bong Soriano (BANAT NEWS)