Yayoy gikapoy na kang Pacquiao

CEBU, Philippines – Giangkon ni Cebu City Councilor Raul Alcoseba nga siya gikapoy na sa pagpunay og panawag sa kampo ni Manny “Pacman” Pacquiao human palukapaha niini ang Briton nga si Ricky “Hitman” Hatton niadtong miaging buwan.

Si Alcoseba maoy gitahasan kaniadto ni Bise Mayor Michael Rama nga makighinabi sa kampo ni Pacman alang sa pagduaw sa “people’s champ” dinhi sa siyudad.

Nagplano ang kagamhanan sa dakbayan nga hatagan og pasidungog si Pacquiao human malangkat niini ang IBO light-welterweight belt gikan kang Hatton.

Gawas niini, nagplano pa gyud usab ang siyudad nga hatagan og titulo si Pacman isip Mega Promoter sa turismo sa nasud tungod sa pagkainila niini sa tibuok kalibotan.

Apan labihang bisiha sa schedule sa people’s champ sukad sa iyang kadaugan niadtong Mayo 3 sa ilang away ni Hatton didto sa Las Vegas Nevada.

May schedule na unta niadtong Mayo 18 apan nausab ngadto sa Mayo 25 ug Mayo 27, hangtod nga nakanselar ra gyud ang tanan tungod sa nahaunang commitment ni Pacman.

Matud ni Alcoseba nga dihang nakahigayon siya sa pagpakighinabi ni Pacman, iya kining gisultihan nga mao na lay mopahibawo kanila kung kanus-a kini mabakante.

Matud sa konsehal nga si Pacman mipasalig kaniya nga manawag sa hinapos niining buwana nganhi sa Sugbo human niya dawaton ang iyang award didto sa New York ug mao kini ilang gipaabot karon, matud pa ni Alcoseba. – Elly Bolonos (BANAT NEWS)