Mga kadete sa UCLM gi-monitor sa DOH-7

CEBU, Philippines - Gikabalak-an ni Department of Health-7 director Susanna Madarieta nga duna pay laing kadeteng mataptan sa sakit nga Influenza A(H1N1) diha sa Maritime Department sa University of Cebu Lapulapu Mandaue campus.

Kini human masutang positibo sa maong sakit ang tulo ka mga tinun-an nga nagpuyo sa usa ra ka dormitoryo kauban sa 600 ka mga kadeteng pulos scholars sa Norwegian Ship Owners Association Project diha sa UCLM.

Kini bisan paman wala na panghilanti ang tulo, magpabilin pa gihapon ang pag-quarantine sa 600 ka mga kadete.

Si Dr. Madarieta sa pakighinabi sa Banat News mibutyag kagahapon nga padayonon nila ang pag-monitor sa mga kadete partikular na niadtong mga kauban sa mismong lawak sa tulo ka tinun-an.

“Kadtong tulo ka positive sa virus (AH1N1) naka-recover na sila. Ang atoa nalang usban pa nato sila pagkuha og swab sample karong adlawa kung wala nab a gyu'y virus sa ilaha,” sumala pa ni Madarieta.

Niadtong milabay'ng semana pito kanila ang gipanghilantan(lima sa unang pag-report) nga giingong pulos tag-as kaayo ang hilanat, ang pito gipangkuhaan og swab sample ug gipadala ngadto sa DOH-7 ug migawas nga positibo ang tulo sa A(H1N1) virus.

Nagtuo si Madarieta nga sa pag-abot palang sa maong mga tinun-an sayo ning bulana sa pagsugod sa klase nakighimamat gyud sila sa ubang mga kadete ug karon maoy ilang gipang-monitor.

Kagahapon gipadala ni Madarieta si Renan Cimafranca sa surveillance unit sa infectious disease sa DOH-7 diha sa UCLM aron pag-monitor ug pagkuha og mga bag-ong swab samples sa mga kadete.

Karong adlawa mopahigayon og massive disinfection operation ang health authorities uban sa kadagkoan sa UCLM diha sa maong dormitoryo ug sa tunghaan pinaagi sa pagbutang og mga disinfectant sa mga pasilyo, lamesa, bungbong ug uban pang dapit nga kasagaran mahikapan sa mga tinun-an aron masigurong luwas kini sa maong virus sa pagbalik sa klase karong Hunyo 29. – BANAT NEWS