Magtiayon gipamusil sa sikyu

CEBU, Philippines - Patay ang usa ka retiradong opisyal sa Philippine National Police ug ang asawa niining administrator sa Special Economic Zone sa Naga sa dihang kalit gipaulanan og mga bala samtang nagpahayahay sa usa ka payag sa Manila Rubber Corporation (MRC) sa barangay Cantao-an lungsod sa Naga pasado alas 6 sa miaging gabii.

Patay nang miabot sa tambalanan ang retiradong Koronel nga si Francisco Arada samtang ang asawa niining si Atty. Mary Jane Arada nakabsan sa kinabuhi diha sa South General Hospital.

Ang kapolisan nakaabot pa kang Atty. Arada ug mitumbok nga ang mga gwardiya nilang sila si Rachel Omawan, 31, kasamtangang nagpuyo sa barangay Ibo syudad sa Lapulapu ug lumad nga taga Tabina Pagadian City, Zamboanga del Sur ug Rudynas Danding, 34, molupyo sa Tuyan lungsod sa Carcar maoy mipusil kanila.

Ang duha ka suspek mga sakop sa Janthro Security Agency ug nadestino diha sa maong edipisyo nga diin magpuyo ang magtiayong biktima.

Matud pa ni PO2 Miguel Castañares sa Naga Police station sa pakighinabi sa Banat News nga ang magtiayon gikatahong nagpahangin diha sa maong payag dihang kalit gipamusil.

Ang mga biktima nakaangkon og daghang mga samad pinusilan sa nagkadaiyang parte sa lawas nga maoy nakaingon sa ilang kamatayon.

Ang mga suspek daling mipalayo sa dapit human sa insidente apan gumikan sa impormasyong gibutyag ni Atty. Arada nasikop kini sa hot-pursuit operation pipila ka oras ang nakalabay.

Dugang pa ni Castañares nga sa dihang nagtinga na si Atty. Arada mibutyag kini kanilang ipadakop ang duha nila ka gwardiya ug midugang pa sa pag-ingon “mag-ingat kayo, dalawa sila.”

Gikatahong human niini nakabsan dayon sa iyang kinabuhi si Atty. Arada samtang ang kapolisan daling miadto sa crime scene ug didto ilang naabtan ang duha ka gwardiya nga nag-posting sa ilang pwesto.

Matud usab ni Supt. Anthony Bagarinao, hepe sa Naga Police sa pakighinabi sa Banat News nga may kalambigitan sa trabaho ni Atty. Arada ang motibo sa pagpatay kanila.

Gikatahong wala mauyuni sa magtiayon ang maong mga gwardiya, nasayran nga niadtong milabay'ng buwan mireklamo ang duha ka gwardiya ug laing tulo nila ka mga kauban diha sa police station batok kang Atty. Arada.

Gipasanginlan nila kining nanion kanila og shotgun tungod kay wala sila mauyoni niini.

Nakuha diha sa crime scene ang upat ka kabhang sa kalibre .45.

Si Bagarinao mibutyag nga dunay nakasaksi sa panghitabo nga nakatug-an nga duna pay usa ka wala mailhing tawong kauban ang duha ka mamumuno, ang maong tawo gikatahong diha ra sa motorsiklo nagpaabot.Ang suspek nga Rachel Omawan sa pakighinabi sa Banat News kusganong mihimakak sa pasangil ug walay rason aron siya magbaton og aligutgot sa magtiayon.

Nangangkon usab siyang diha ra gyud siya sa guardhouse atol sa pagkahitabo apan wala siya makadungog og buto sa armas tungod kay toa sa ubos ang maong payag.

Samtang gisuwayan unta pagkuha og habig si Danding apan nagdumili kini sa pagtubag.

Ang duha gipailawom na sa paraffin test pagtino kun nakapabuto ba sila og armas. – BANAT NEWS