Dugang tindahan sirhan karon

CEBU, Philippines - Laing napulo kapin ka mga balay patigayon sa siyudad sa Sugbu ang gitakda na usab nga pakandaduhan sa kagamhanan sugod karong adlawa human pirmahe ni Mayor Tomas Osmeña ang closure order alang niini.

Lakip sa pasirad-an mao mga balay patigayon diha sa dalan Manalili, Jakosalem, Colon, Escario, Bonifacio, Legaspi ug uban pa.

Gipahibawo ang mga tag-iya niini bahin sa pagpasira kanila tungod sa kapakyas nila sa pagbayad sa ilang buhis ngadto sa gobyerno.

Gihingusgan karon ang pagkolekta og buhis sa siyudad human madismaya si Mayor Tomas Osmeña sa kagamay sa koleksyon sa buhis sa nangaging mga buwan.

Gani gumikan niini pahulipan sa mayor ang City Treasurer nga si Renee Empaces sa katungdanan kang Ofelia Oliva kinsa nahimo na usab nga mamahandi sa siyudad niadtong tuig 2001.

Nasayran nga si Oliva nakigtagbo na sa mga sakop sa City Treasurer’s Office niadtong miaging Biyernes sa hapon sa kalagmitang molingkod na kini sa katungdanan karong adlawa.

Samtang sa laing bahin gipasidan-an sa hepe sa tax mapping division Nanette Sungahid, ang mga negosyante sa siyudad nga likayan niini ang mga fixer.

Kini human masuta ni Sungahid nga may mga balay patigayon sa dakbayan nga nagtinir og mini nga business permit.

Matud ni Sungahid nga aron dili mabiktima sa mga fixer, adto lang moduol sa hingtungdang mga kawani sa City Hall kung molukat og permit. – BANAT NEWS