Kampanya vs. dengue padayon

CEBU, Philippines – Nagpadayon ang gihingusgang kampanya sa kagamhanan sa dakbayan sa Sugbu batok sa makamatay nga sakit nga dengue.

Kini taliwa usab sa nagpadayong information dissemination nga gihimo sa siyudad batok sa gikahadlukang sakit nga A H1N1 flu.

Sentro sa kampanya sa City Health Department mao ang nagkadaiyang mga tunghaan samtang giobserbar sa siyudad niining buwana ang dengue awareness month.

Kagahapong adlawa, gitakda sa City Health ang pagpahigayon og school mist spraying sa pipila ka mga tunghaan sa dakbayan.

Gawas niini ang mga local health officials nipahigayon na usab og school-based pulong-pulong alang sa dengue ug A H1N1 flu.

Lakip sa mga tunghaan nga naduaw sa mga tinugyanan sa City Health mao ang Florencio Urot, Abellana, Carreta, Guadalupe, Ramon Duterte ug uban pa.

Ang dengue coordinator sa siyudad nga si Doctor Raymund Ogan, una nang nipahibawo nga ilang target mao ang pagwagtang sa sakit nga dengue dinhi sa dakbayan.

Nasayran hinoon nga duna gihapoy mga nabiktima sa nahisgutang sakit bisan pa man sa hinugtanay nga kampanya sa City Health niini.

Gani niadtong miaging semana, ang City Health nakatala og 20 ka kaso sa dengue base usab sa mga biktima nga nalandig sa tambalanan. – Elly Bolonos (BANAT NEWS)