CEBU, Philippines – Unom ka gatos ka mga kadete sa University of Cebu Lapulapu-Mandaue Campus sa dakbayan sa Mandaue ang gipaubos sa ‘self-quarantine’ human tulo sa ilang mga kaubang kadete ang napositibo sa Influenza A(H1N1) virus, sumala pa sa tag-iya sa maong tunghaan.
Gumikan niini gikanselar una sa UCLM campus ang klase sugod ugmang adlawa ug subling mobalik ang klase karong Hunyo 29 aron paglikay nga duna pay mataptan.
Si Atty. Agusto Go, tag-iya sa maong unibersidad sa pakighinabi sa Banat News nagkanayon nga dunay lima ka mga kadete sa Maritime department sa ilang tunghaan ang nasakit sa milabay'ng semana.
Ang maong mga kadete giipon og puyo uban sa 595 pa ka ubang mga kadeteng susama nila og mga kurso sa usa ka dormitoryo sulod sa UCLM compound.
Sila pulos mga iskolar sa Norwegian Ship Owners Association nga gipili gikan pa sa nagkalain-laing mga maritime schools sa nasud ug diha gipatungha sa UCLM.
Si Go mibutyag nga sa lima ka mga nasakit niadtong adlaw'ng Huwebes nga gikuhaan og swab sample ug gipadala ngadto sa Manila alang sa laboratory examination, migawas sa resulta kagahapon nga tulo kanila ang positibo sa maong sakit.
Hinuon giklaro ni Go nga ang laing duha hingpit nang naayo sa ilang trangkaso samtang ang tulo nga napositibo sa A(H1N1) nagsugod na usab og kabalik sa maayong panglawas.
Ang tulo pulos gikan pa sa Luzon matud pang Go ug kasamtangan nang gibuwag sa ubang mga tinun-an ug giatiman sa ilang mga doktor ug gimonitor na usab karon sa Department of Health-7.
Gibutyag usab niyang duna silay paigong medisina alang sa maong sakit sama sa Tamiflu nga maoy gigamit karon sa DOH nga tambal batok sa maong sakit.
Lakip sa misusi mao si DOH-7 director Dr. Susana Madarieta ug mga opisyales sa dakbayan sa Mandaue aron matan-aw ang angayang mga gikinahanglang buhaton.
“We are advised to quarantine the 600 cadets so that they’ll stay in their dormitory and monitored,” sumala pang Go gumikan kay dunay posibilidad nga nagkahimamatay na ang mga nataptan sa maong sakit sa uban pang mga kaubang kadete sa milabay'ng mga adlaw.
Giklaro usab niyang ang mao rang departamento ang dunay kaso sa A(H1N1) ug walay labot ang ubang departamento apan aron gyud masigurong luwas ang ubang mga tinun-an kanselahon lang una ang klase.
“We are doing this for precautionary measure..we will take all necessary steps to safeguard the health of our students,” matud pang Go.
Ang maong sakit nagsugod sa nasud sa Mexico ug unang gidudahang gikan sa sakit sa baboy nga mitapot na sa tawo, kini mikalas na og gatusan ka tawo sa nagkalain-laing sakit ug mitakod sa liboang mga tawo sa maong mga nasud lakip na dinhi sa Pilipinas.
Sa labing ulahing talaan sa DOH duna nay natalang kapin sa 200 ka tawo ang nataptan niini dinhi sa Pilipinas. – BANAT NEWS