Government vehicle way logo dakpon - Visayas Ombudsman

CEBU, Philippines – Higpit unya nga ipatuman sa Visayas Ombudsman (VO) ang pagpangsikop sa mga sakyanan sa gobiyerno nga walay logo agi og katumanan sa bag-ong gipagawas nga circular sa Commission on Audit (COA).

 Sumala pa ni Assistant Ombudsman Virginia Palanca Santiago nga gisugdan na nila ang paghatag og  sulat sa tanang mga government agencies nga nagpahibalo sa hugot nga pagpatuman sa kamanduan sa COA.

 Kini human naobserbahan sa buhatan sa Ombudsman nga daghang nga government agencies nagdumili sa pagtuman sa maong kamanduan.

 Matud pa ni Santiago nga gihatagan nila og ultimatum ang tanang mga government- agency sa pag-comply sa kamanduan sa COA nga mobutang og logo sa ilang buhatan ngadto sa tanang mga government-owned vehicle aron dali ra nga masayran sa mga otoridad ang nanag-iya sa maong sakyanan.

 Si Santiago nagkanayon nga 15 hangtod sa 30 ka adlaw lamang ang ilang gihatag nga lugway sa dili pa nila hingpit nga ipatuman ang maong kamanduan. Dugang pa niini nga ila gyud nga sikopon ang drayber ug posibleng apilon sa pagpasaka og kaso ang mga opisyales kun dili gihapon motuman sa COA circular.

 Samtang gipahibawo ni Santiago nga ubay-ubay na sa mga opisayles ug kawani sa gobiyerno ang ilang gipasakaan og kaso tungod sa paggamit sa sakyanan sa gobiyerno sa personal nga katuyoan pinaagi sa paningkamot sa Task Force Red Plate. – Chester Abadilla ug Rey Pasaporte (BANAT NEWS)