CEBU, Philippines – Mga residente sa barangay Lagtang nga naapektohan sa baha nga giingong gikan sa gi-develop nga subdivision sa ibabaw nga bahin sa ilang lugar mitiyabaw na usab tungod kay dili na sila makaagi diha sa ilang karsada.
Si Kapitan Celiapo Cabuenas sa pakighinabi niini sa Banat News kagahapon nagkanayon nga ang karsada nga kanhi proyekto ni Kongresista Eduardo Gullas niadtong tuig 2000 nangaguba na tungod kay anha moagi ang baha nga dunay dalang lapok.
Giingong gikan ang maong lapok sa kinubkob nga bahin sa usa ka subdivision sa ibabaw’ng bahin sa lugar.
Ang nahisgutang karsada usa ka ‘farm to market road project” ni Gullas nga dunay gitas-ong usa ug tunga ka kilometro nga nagsumpay sa sitio Tangub ug Iba.
Matud ni Cabuenas nga niadto ang maong karsada maagian pa og sakyanan apan karon dili na gani maagian og tawo dihang gipalapdan pa ang pag-develop sa subdivision nga ilang gipasanginlan sa pagkaguba sa karsada.
Ang nahisgutang subdivision (ngalan gipugngan) gireklamong walay klarong drainage hinungdan nga anha mosubay sa karsada ang tubig niini.
Ang mga taga sitio Iba ang anha moagi sa barangay Bulacao, Talisay paingon sa Candulawan ug anha molusot sa nahisgutang subdivision balik sa Iba.
Ang maong sitwasyon nakahatag og kahasol sa mga residente sa lugar ilabi na usab nga gikan sa alas 6 sa buntag hangtod sa alas 10 sa gabii lang sila tugotang makaagi sa subdivision.
Si Cabuenas miduso na og reklamo kabahin niini ngadto sa kagamhanan sa siyudad ug gani gisusi na kini, apan hangtod karon wala pa mahatagi og aksiyon. – BANAT NEWS