Fortuna barugan ni Nerry

CEBU, Philippines – Gihulagway sa Department of Interior and Local Government (DILG-7) nga usa ka dakong kalapasan sa balaod ang bahad ni Mayor Tomas Osmeña nga pag-withdraw sa basic services sa siyudad ngadto sa mga pribadong tunghaan ug tambalanan gumikan sa pagdumili nila pagbayad og local taxes.

Matud ni DILG-7 director Pedro Noval dihang nahinabi sa Banat News subay sa nalatid sa Local Government Code nga obligado ang tanang lokal nga kagamhanan paghatag og maayong serbisyo sa ilang konstituwente bisan wala kini magbayad og buhis.

Partikular nga gitumbok ni Noval mao ang pagpatunhay sa kahusay ug kalinaw sa palibot sa maong mga establisamento ingon man ang adlaw-adlaw nga pagpanghipos sa mga basura ug uban pa nga responsibilidad sa dakbayan.

Si Osmeña mibahad nga putlan sila og basic services sa maong mga tunghaan ug hospital sama sa dili na pagbutang og mga traffic enforcers, dili na usab kolektahon ang mga basura ug labaw sa tanan dili na parespondehan sa kabomberohan kun dunay motumaw nga alarma sa sunog sa maong mga establisamento.

Nagtuo hinuon si Noval nga emosyon lang kadto sa mayor ug dili niya kini tinud-on ang maong bahad gumikan kay nasayod man kini sa iyang mga gimbuhaton.

Nasayran nga ang Cebu Doctors University (CDU), Cebu Doctors Hospital (CDH), North General Hospital, Sacred Heart School, Velez Hospital, Cebu Institute of Technology (CIT) ug Southwestern University (SWU) mipasaka og kaso sa siyudad sa korte nga pending pagkakarun nga nagkwestyon sa ordinansa sa dakbayan nga maoy gibasihan pagkolekta nila og buhis sa siyudad.

Apan si Osmeña mibutyag sa mga tigbalita kagahapon nga angayang mas magmatngon ang mga tag-iya sa mga nahisgutang tunghaan batok sa ilang mga abogadong maoy tigsulsol kanila nga adto nalang ipaabot sa korte ang maong isyu.   

Ang legal counsel sa Cebu Doctor’s University ug Cebu Doctor’s Hospital nga si Atty. Cornelio Mercado una nang mihagit sa mayor nga tinud-on ang bahad niini.   

Wala na masurpresa si Osmeña sa gipadayag ni Mercado tungod kay kini giingong maoy estratehiya ug trabaho sa mga abogado.

“If you’re a lawyer what more do you want, amicable settlement? That’s not money making mawad-an sila og trabaho ana. I’m calling the attention of the universities and hospitals bantay lang diha kay your lawyer is just acting for his own personal interest,” dugang pamahayag sa mayor.

Sa pikas bahin, wala usab igsapayan ni Osmeña ang pamahayag sa tag-iya sa University of Cebu (UC) nga si Atty. Agusto Go nga nag-ingong adto nila ihapak sa balayronon sa mga tinun-an ang buhis nga kolektahon sa dakbayan kun ugaling kini mahinayon.

Matud pa ni Osmeña kun kini buhaton sa mga tunghaan iya kining ipasusi sa Commission on Audit (COA) aron sutaon kun tinuod ba ang giinsister nilang non-profit (de negosyo) ang ilang mga tunghaan taliwala sa taas nga gipangayong bayranan sa matrikula. – Darrel Carumba ug Elly Bolonos (BANAT NEWS)