Nanghinol nga 'recruiter' gikasuhan

CEBU, Philippines – Gipasakaan na og kasong illegal recruitment niadtong Miyerkules sa hapon ang giingong mahuyang nga gipasanginlan sab nga mihinol sa mga kinatawo sa mga lalaking aplikante niadtong Lunes sa sitio Ilang-ilang, barangay Lagtang, dakbayan sa Talisay.

Si PO2 Roy Lofranco sa Talisay City Police Station sa pakighinabi niini sa Banat News mibutyag nga unom sa mga biktima ang mipasaka og kaso batok kang Adrian Albores alyas “Adrian Cervantes” 31-anyos, taga Private Road, P. Del Rosario, dakbayan sa Sugbo.

Ang mga miduso og kaso mao sila si Jenny Bacus ug ang magsuong Lyn ug Rose Tanzo ug ang tulo ka lalaki lakip na niini ang usa ka menor de edad.

Matud sa nahisgutang polis nga iyang nasuta ngadto sa Department of Labor And Employment (DOLE) nga si Albores dili authorized o rehistradong job recruiter sa nahisgutang ahensiya.

Si Lofranco midugang nga si Albores miangkon ngadto kaniya nga tungod sa kalisod maong nabuhat niya ang nahisgutang binuang ug lumad siya nga taga Davao ug gani wala siya’y mga paryente dinhi sa Sugbo.

Kahinumduman nga 23 ka mga tawo ang giingong nailad ni Albores ug unom niini mga lalaki nga giingong giderektang gipaubos sa suspetsado og physical examination pinaagi sa paghinol-hinol sa ilang mga kinatawo agi og pagtimbang aron sutaon kun physically fit ba sila.

Gipasanginlang nangayo og P15 matag usa ka aplikante alang kunohay sa ilang ID ug P215 alang sa X-ray apan ang mga biktima ang natahap hinungdan nga wala sila mohatag sa P215.

Si Felix Dino, tanod sa barangay ang nakadawat og taho kabahin sa giingong pagpangilad ni Albores diha sa barangay Tabunok sa samang modus hinungdan nga ilaha kining gisikop ug gidala ngadto sa Talisay City Police Station sa barangay Poblacion niadtong Martes. – Brenda Batuto (BANAT NEWS)