Tinun-an sa Eastern Visayas sa A(H1N1) positibo

CEBU, Philippines – Usa ka tinun-an sa Philippine Science High School sa Eastern Visayas campus (PSHS-EVC) maoy labing una nga pasyente nga napositibo sa A (H1N1) virus.

Ang maong tinun-an giatiman na sa Eastern Visayas Medical Center sumala pa sa report sa ABS-CBN news.

Nunot niini, ang klase sa maong tunghaan temporaryo unang gisuspenso ug gikatakdang mobalik kini karong unang semana sa bulan sa Hulyo.

Si Dr. Nicholas Bautista, Regional Epidemiology of Department of Health mitambag sa mga tinun-an sa nahisgotang tunghaan nga mag-self quarantine ilabina kadtong dunay close contact sa maong pasyente. Ang mga tinun-an gihatagan na og mga giya kun unsaon nila pagpanalipod sa maong makamatay nga sakit.

“We all just relax. These are mild cases and nothing to worry,” matud pang Bautista.

Mitambag usab ang DOH nga patas-an ang ilang body resistance ug i-apply ang hustong hygiene aron mahalikay sa mga sakit ilabina ang A(H1N1) flu virus. – BANAT NEWS