Abella nahimong 'Most Outstanding Geodetic Engineer'

CEBU, Philippines – Usa ka Sugbuanong enhinyero nakadawat og pasidungog isip “Most Outstanding Geodetic Engineer” sa Geodetic Engineer of the Philippines (GEP) atol sa awarding ceremony nga gipahigayon niadtong miaging adlaw didto sa Davao City siya mao si Engr. Felix D. Abella, 79, kinsa nakadawat sa labing dakung award sa GEP gumikan sa dakong natampo niya sa paglambo sa maong organisasyon sukad pa niadtong tuig 1975, diin siya nahimong una nga Bise-Presidente sa National Geodetic Engineers of the Philippines nga gikan sa Kabisay-an.

Ang GEP mao ang bugtong organisasyon sa mga enhinyero sa nasud nga giila sa Professional Regulatory Commission (PRC).

Si Abella kinsa produkto sa Abellana National High School nahimong sakop sa kanhi Land Settlement and Development Corporation nga karon gitawag na og Department of Agrarian Reform (DAR).

Sa usa ka seminar nga gipahigayon niadtong Martes diha sa Golden Prince Hotel, si GEP National President Reuel T. Pintor nagkanayon nga ang mga hurado nga gilangkuban sa 17 ka mga miyembro sa Board of Governors sa ilang organisasyon, mipili ni Abella tungod sa dedikasyon niini sa pagpalambo sa ilang kapunongan.

Midugang si Pintor nga bisan pa kun retirado na si Abella, mao gihapon kini ang ilang gihatagan sa award tungod sa dili matupngan nga amot niini sa kalamboan sa ilang kahugpongan ug sa background niya isip aktibo nga public servant.

Si Abella anaa na sa ikatulong termino niya isip Barangay Kapitan sa Labangon diin siya nagsilbe sa maong katungdanan sulod na sa 12 ka tuig.

Si Abella nagkanayon nga ipadayon pa niya ang pagserbisyo sa barangay ilabi na nga siya usab ang National President sa Senior Citizen of the Philippines nga nagtinguha nga makatabang sa mga katigulangan pinaagi sa paghatag kanila og mga maayong benepisyo. – Lemuel P. Maglinte (BANAT NEWS)