Kid's center sa Lapulapu gibuksan ni Radaza

CEBU, Philippines – Pormal nang giablihan ang "Home Care Center for Children" (HCCC) diha sa sitio Tugas, barangay Gun-ob dakbayan sa Lapulapu kagahapon sa buntag nga maoy butangan sa mga kabataang nakahimo og mga kalapasan sa balaod.

Gipangunayan ni Lapulapu First Lady nga mao usab ang barangay kapitan sa Mactan Paz Radaza ang pagpahigayon niini uban sa mga kadagkuan sa Department of Social Welfare and Development sa dakbayan.

Ang DSWD sa Lapulapu maoy modumala sa maong sentro.

Matud pa ni Radaza kabahin kini sa adbokasiya sa dakbayan pagluwas sa mga kabataang naglibod-suroy lang sa palibot sa dakbayan sa Lapulapu (street children).

Tumong usab niini nga gawas sa paghatag og kapasilungan sa mga libud-suroy dinhi usab dad-on ang mga minor offenders imbes nga sa mga prisuhan sa mga hamtong.

Dinhi sa maong pasilidad sila tudloan sa maayong pamatasan ug uban pang angayan nilang makat-unan aron sa panahon nga ibalik na sila ngadto sa ilang mga ginikanan duna nay direksyon ang ilang mga kinabuhi.

Sa pagkakaron, daghan nang mga NGO's sa dakbayan sa Lapulapu ang mitabang sa mga kabataan nga libod-suroy apan igo lamang sa pagpakaon kanila ug wala nay sunod nga gibuhat alang sa ilang kaugmaon.

Ang HCCC adunay tulo ka andanang edipisyo nga magsilbe usab nga classroom sa mga bata nga abagan usab sa DepEd Lapulapu, ang DepED gihangyong magbutang og magtutudlo alang sa maong pasilidad.

Ang DSWD head sa Lapulapu Ermilita Degamo midugang nga duna usab silay livelihood ug skills training program nga itudlo sa mga minor de edad aron kung mamahimo nang legal ang ilang panuigon ug mogawas na sa sentro aduna na silay nahibaw-an nga magamit nilang pangabuhian.

Kini sama sa pagpangluto ug pagpang-welding ug uban pang panginabuhian.

Sa pagbisita sa Banat News sa HCCC kagahapon sa buntag, naabtan si Degamo nga nagpahigayon og seminar sa mga molangkob sa staff sa maong sentro nga maoy moatiman sa mga kabataang masulod sa maong pasilidad. – Bong Soriano (BANAT NEWS)