Koreano namatay sa barko

CEBU, Philippines – Patay nang nakit-an sulod sa iyang cabin sa barko ang 57-anyos nga Koreano nga chief cook sa barko nga naghatud og mga liquefied petroleum gas sa pantalan sa barangay Bawo lungsod sa Sogod niadtong Lunes sa alas 5:00 sa hapon.

Ang namatay mao si Jeheui Geugo, 57, taga Busan, Sahagon Dea Jungdong sa South Korea ug maoy chief cook sa barkong MT-G Elite of Honor Merit Philippines Incorporated.

Matud pa ni Sr. Insp. Ramon Lacno sa Sogod Police Station sa pakighinabi sa Banat News ang kapitan sa maong barko nga si Park Dae Sik ingon man ang Pilipinong Seaman nga si Daniel Obedosa maoy mipugos og abli sa cabin ni Jeheui.

Kini human sa pipila na ka oras nga wala na nila kini makit-ing migawas-gawas sa iyang cabin sukad sa ilang pag-angkorahi sa pantalan sa Bawo human sa ilang paghatud sa mga LPG gikan sa Korea.

Apan dihang naabli na nila ang pultahan mao nalay ang ilang nakita nga wala nay panimuot si Jeheui nga naglingkod sa lingkoranan hinungdan nga nangayo dayun sila og pakitabang sa kapulisan.

Daling miresponde sila si SPO3 Reynaldo Branzuela ug mga kaubanan inubanan sa kapitan sa barangay nga si Sara Roble ug gihatod sa tambalanan ang maong Korean national sa Juan Dosado Memorial Hospital sa barangay Damulog apan gideklarar kini sa mga doktor nga dead on arrival.

Gituohan sa kapulisan nga gi-atake ang biktima sa sakit nga maoy hinungdan sa kamatayon niini sanglit matud pa sa mga kauban niini nagsaulog paman kini sa iyang adlaw'ng natawhan niadtong higayuna sa wala pa makit-ing namatay.

Ang kapulisan nagpaabot pa sa resulta sa autopsy sa biktima diin kasamtangan karong gihaya sa Rolling Hills sa dakbayan sa Mandaue. – Darrel Carumba (BANAT NEWS)