CEBU, Philippines – Nalandig sa tambalanan ang usa ka lalaking amang kinsa giingong usher og masiao ug gikatahong kanhi “parok” (mamaligyaay og shabu) human kini pusila sa wala mailhing lalaki niadtong Lunes sa gabii samtang mitabok sa sapa paingon na nga mopauli sa iyang balay sa sitio Krusan, barangay Bulacao, dakbayan sa Talisay.
Ang biktima giila sa mga polis nga si Rolly Tabura, 50, residente sa nahisgutang lugar kinsa nakaangkon og usa ka samad pinusilan sa iyang tiyan.
Si Tabura daling gidala sa iyang mga silingan ngadto sa Talisay City District Hospital apan tungod sa kahimtang niini gibalhin siya ngadto sa Vicente Sotto Memorial Medical Center.
Base sa imbestigasyon sa mga polis si Tabura ang mitabok diha sa sapa paingon nga mopauli na apan kalit lang dunay buto sa pusil gikan sa ngitngit nga bahin sa lugar ang mipaka.
Si Tabura nga naigo sa tiyan midiretso og kahagba sa yuta apan daling mibarog ug midagan paingon sa iyang balay apan diha palang sa tugkaran nahagba na kini pag-usab ug nakit-an sa mga silingan.
Si SPO1 Oliver Dacua ang duty desk officer kagahapon sa pakighinabi niini sa Banat News nagkanayon nga miangkon si Tabura nga kaniadto nalambigit siya sa drugas ug karon nag-usher nalang sa masiao isip pangabuhian. Wala pa matumbok sa kapolisan ang motibo sa pagpamusil sanglit wala makakita ang biktima sa mamumuno. – Brenda Batuto (BANAT NEWS)