Cebu Zoo padayunon pagpanindot bisan sa hulga sa Kapitolyo

CEBU, Philippines – Padayong paninduton sa kagamhanan sa dakbayan sa Sugbu ang Cebu City Zoo samtang pabilin usab nga nagpakahilom ang kagamhanang probinsyal sa lakang niini pagbawi sa kapin sa pito ka ektaryang luna nga giukupahan sa nahisgutang wildlife park.

Matud pa ni Konsehal Nestor Archival nga iyang isugyot nga butangan og recreational center ang zoo gawas sa pagtukod og mga kiosko niini nga mahimong katun-an sa mga estudyante.

Ang konsehal nga maoy chairman sa Committee on Environment sa City Council nagplano usab pagpabutang og composting facility diha sa nahisgutang dapit.

Nakita usab ni Archival ang panginahanglan sa dugang comfort room sa zoo alang sa mga bisita niini, ingon man freezer alang sa pundong pagkaon sa binuhing mga hayop.

Sa susamang kalamboan naaprubahan na usab sa City Council ang giduso nga resolusyon sa konsehal alang sa pagtukod og crocodile ug duck pond diha sa zoo.

“Atong padak-an ang pinuy-anan sa atong buaya ingon man ang atong mga pato aron ma-feel sab nila ang natural habitat ba, sumala ni Archival. Butang usab nga gikalipay sa manager sa zoo nga si Giovanni Romarate nga nangandoy nga mapanindot pa ang iyang gidumala nga wildlife park. Nakasiguro si Romarate nga mudaghan pa unya ang mga hayop diha sa zoo kung mapalapdan ug mapanindot ang mga pinuy-anan niini.

“Modaghan gyud ning atong mga hayop kay daghan kaayo ta og nadawat nga mga pledges nga mo-donate og animals, wala lang tay tarong nga kabutangan,” matud pa ni Romarate.

Nagtoo si Romarate nga kung modaghan na ang binuhing mga hayop diha sa zoo, modaghan na usab unya ang mobisita niini matag adlaw.

Nasayran nga nipatuman na og entrance fee ang kagamhanan sa dakbayan sugod niadtong Marso 18 alang niadtong mahigugmaon sa mga hayop.

Pabayron og P10 ang bata ug P25 usab sa mga hamtong ug dunay 15 porsiyentong diskwento ang ihatag niadtong grupo nga mosulod sa nahisgutang wildlife park.

Matud pa ni Romarate nga tungod sa entrance fee ang zoo nakahipos na sila og P81 mil gikan niadtong buwan sa Marso hangtud niadtong Hunyo 2 nga mas taas itandi niadtong donation lang ang pangayoon sa zoo nga giingong mokita lang og P500 nga average matag tulo ka buwan. – Elly Bolonos (BANAT NEWS)