Itunol na ang mga sertipiko alang sa mga iskolar sa Kapitolyo karon

CEBU, Philippines – Personal nga itunol ni Gobernador Gwendolyn Garcia karung adlawa ang mga sertipiko ngadto sa tanang mga scholars nga tinun-an sa probinsya pagtungha sa kolehiyo.

Subay sa record sa provincial school board, dunay 112 ka mga scholars ang probinsya nga misugod na sa pagtungha atol sa pormal nga pagbukas og balik sa klase niadtong Lunes.

Ang recognition rites sa mga scholars sa probinsya himuon karung adlawa diha sa Capitol Social Hall nga tambongan sa gobernador ug Bise Gobernador Gregorio Sanchez uban sa mga board members.

Dunay sobra usa ka libo ang mi-apply sa scholarship program sa Kapitolyo karung tuiga apan 112 lang ang nakapasar sa tanang rekisitos sama sa income sa pamilya nga dili molapas og P120 mil ang buwan.

Ang maong mga tinun-an gipatungha karon diha sa Cebu Normal University (CNU) ug Cebu State College Science and Technology (CSCST).

Nunot niini gikalipay og maayo sa mga ginikanan niining 112 ka mga tinun-ang scholars ang naangkong kahigayonan nga makapadayon sa pagtungha sa kolehiyo.

Matud pa nila maglisod gyud sila pagpa-eskuyla sa ilang mga anak bisan paman og dunay mo-offer nga tunghaan og scholarship program tungod kay mohatag gihapon sila og allowance ngadto sa ilang mga anak nga nagtungha.

Ang mga tinun-an gawas nga librehon sa tuition ug uban pang balayrunon sa eskuylahan makadawat usab og binuwang allowance. – Rey Pasaporte (BANAT NEWS)