Centcom may bag-ong kumander

CEBU, Philippines – Bag-o na ang pangulo sa Central Command sugod kagahapong adlawa human si Major Gen. Armando Cunanan mi-retiro na sa katungdanan ug gihulipan siya ni Lt. Gen. Isagani Cachuela kinsa gikan sa Northern Luzon Command.

Ang change of command gipanguluhan mismo ni AFP Chief of Staff Victor Ibrado, uban sa mga kadagkuan sa militar, PNP ug mga kabanay sa niretirong opisyal ug mga lokal nga opisyal dinhi sa Sugbu.

Si Cunanan mipadangat sa iyang mga kalampusan sa iyang pag-serbisyo sa armadong kusog sa nasud sulod sa kapin sa 38 ka tuig sukad siya ni-gradwar sa PMA class 75.

Samtang si Cachuela atol sa pag-atubang niini ngadto sa mga sakop sa media misaad nga sa unang semester sa 2010 mapupos na ang problema sa insurhensiya sa nasud ilabi na sa Central Visayas.

Gihulagway niini nga duol na ang kadaugan sa AFP batok sa mga rebeldeng komunista hinungdan nga ni-adopt na sila karon og mga pamaagi sa paggukod sa rebelde.

Gipaabot nga tiwason ni Cachuela ang nasugdang mga kampanya sa mga nangaging Centcom commanders batok sa mga rebeldeng komunista, ang militar milusad sa mga nagkalain-laing pamaagi sa pagpukan sa mga rebelde.

 Kini gawas sa paggamit sa pwersa gigamitan usab nila kini og pamaaging wala magkinahanglan og gamit sa armas kini sama sa mga civil military operations, medical mission, infrastructure projects ug uban pa.

Ang mga kalihukan sa militar dunay koordinasyon sa mga local government units sa mga dapit nga dunay impluwensya sa mga rebelde aron maoy mohatag og pangabuhian ug kapaingnan ang mga rebeldeng modesider pagbalik sa sabakan sa balaod.

Giawhag niini ang mga rebelde nga mobalik na sa sabakan sa balaod ug kun mahimo moapil sila sa demokratikanhong paagi sa gobiyerno pinaagi sa pagpapili sa election kun ang tumong lang nila pagpatunhay sa kahapsay ug kalinaw sa nasud. – BANAT NEWS