Giagtang pagpusil namatay

CEBU, Philippines – Gipukaw og bala ang usa ka lalaking natulog human kini giunay pagpusil sa iyang higala sulod sa usa ka giparking nga jeep sa Cendet Area, Osmeña Blvd. sa barangay Santa Cruz   sa miaging gabii.

Ang maong lalaki nailhan lang sa ngalan nga Esmer usa ka kundoktor og pasaheroan ug lumad nga taga barangay Mantayupan lungsod sa Barili.

Samtang ang gitumbok nga mipusil kaniya mao si Jhonny Largo, 25, usa ka car watcher sa dalan Sanciangko ug lumad usab nga taga barangay Basak lungsod sa Aloguinsan.

Sa imbestigasyon sa kapolisan gikan sa saksi nangatulog sila sa biktima diha sa maong sakyanan dihang nakamata nalang sila sa buto sa armas. Sa iyang pagbangon iyang nakit-an ang suspek nga nagdali-dali sa paglakaw nga may gibitbit nga wala matinong kalibre sa armas, samtang ang biktima nagkadugo na sulod sa maong jeep.

Ang kauban sa biktima mao nay mitawag sa mga sakop sa Emergency Rescue Unit Foundation apan gikatahong wala na kini matabang gumikan kay diha sa agtang ang igo sa bala diha sa iyang ulo.

Matud pa sa imbestigador sa Cebu City Police Office, Homicide Section SPO4 Jesus Moga sa pakighinabi sa Banat News nga wala pa sila masayod kun unsa gyud ang tinuoray nga hinungdan sa kasuko sa suspetsado nga iyang gipusil ang biktima. – Lesley Caminade (BANAT NEWS)