Batang kargador giluba patay

CEBU, Philippines – Patay ang usa ka 16-anyos nga kargador og softdrinks human giunay og dunggab sa kaubang kargador tungod lang sa ilang panaglalis diha sa ilang trabahoan sa barangay Tabunok siyudad sa Talisay kagahapon sa ala 1:00 sa kaadlawon.

Ang biktima mao si Sunny Dumoghu, 16, lumad nga taga Langub lungsod sa Argao ug stay-in worker isip helper sa bodega sa softdrinks nga nagbase sa barangay Tabunok.

Ang suspek mao ra usab ang iyang kaubang helper nga si Richard Mogiaman, 20, lumad nga taga San Carlos City Negros Occidental.

Matud pa ni SPO1 Oliver Dacua sa Talisay City Police dihang nahinabi sa Banat News subay sa alegasyon sa 21-anyos kauban sa biktima sa trabaho (ngan gipugngan) giingong naglalis ang biktima ug suspek nianang sayo pa sa gabii ug pagkahuman milakaw ang suspek.

Sa pagbalik niini gikatahong nakainom na kini ug walay daghang pangutana gidunggab niini ang biktima gamit ang batangas nga kutsilyo diha sa tiyan.

Human sa pagpanunggab daling misibat pahilayo ang suspetsado samtang ang biktima gitabang sa mga kauban paghatod sa Talisay City District Hospital apan gideklarar kini sa mga doktor nga dead on arrival.

Ang kapulisan padayon pang mihimo og hot pursuit operation batok sa suspek samtang gisubay na kung unsay motibo sa pagpatay. – Darrel Carumba uban sa report ni Lesley Caminade (BANAT NEWS)