Kargador sa Carbon gipatay diha sa Ermita
CEBU, Philippines – Naglunang sa kaugalingong dugo ang usa ka trabahante sa usa ka grocery store sa Carbon Market sa dalan M.C. Briones St. sa barangay Ermita pasado alas 9 sa miaging gabii.
Ang patay'ng lawas nailhan nga si Jessie Potot, 22, lumad nga taga barangay Rizal siyudad sa San Carlos ug usa ka stay-in utility worker sa grocery store nga nahimutang sa 2nd unit sa maong merkado.
Sa pasiunang imbestigasyon sa kapolisan nasayran base usab sa alegasyon sa nakakita sa patay'ng lawas nga si Jomar Pilarin naglunang na kini sa dugo.
Sa pagsusi sa kapolisan duna kini daghang samad dinunggaban sa nagkadaiyang parte sa iyang lawas nga maoy gituohang hinungdan sa iyang hinanaling kamatayon.
Nasayran usab sa kapolisan nga sa wala pa kini makit-ing patay si Pilarin mibutyag nga iya kining gikakuyog sa usa ka karaoke store diin nakakita kini og lalis sa usa ka giila lang og Abay.
Matud pa niya nagkainitay gyud ang duha niadtong tungura ug gisuwayan pa niya og ulang apan wala mopatuo ang biktima kaniya hinungdan nga miuli nalang siya apan mibalik pag-usab sa dapit.
Mao nalang ang iyang kakugang nga sa iyang pagbalik nadunggaban na kini. – Lesley Caminade (BANAT NEWS)
- Latest
- Trending
