RDCC mopatawag og panagtigum agi'g pangandam sa kalamidad

CEBU, Philippines – Ang tsirman sa Regional Disaster Coordinating Council (RDCC) Chief Supt. Lani-O Nerez ang mopatawag og tigom alang sa pagpangandam sa mga kalamidad nga mahitabo ning panahon sa ting-uwan.

Kini maoy gipahibalo ni Nerez, human mahitabo ang insidente niadtong Domingo sa udto nga nalumos ug namatay ang singko anyos nga batang babaye nga si Michaela Son Bedolido diha sa sitio Bato barangay Ermita dihang mibunok ang kusog nga uwan.

Samtang upat ka pamilya ang mibakwit sa barangay hall sa Guadalupe human gisanapan sa tubig ang ilang mga panimalay niadtong Domingo sa gabii diha sa Banawa.

Matud pa ni Nerez nga iyang ipatawag sa dinaliang tigom karong semanaha ang mga sakop sa RDCC uban sa mga kadagkuan sa Civil Defense Office sa ingon ilang pangandaman ang ubang mga kalamidad nga mugna ning pagsige’g uwan.

Tumong ug tuyo nga ma-activate ang mga sakop sa RDCC nga dali usab nilang ma-mobilized sa pagpadala sa bisan asang dapit dinhi sa rehiyon kun dunay mga mabiktima sa kalamidad.

Giklaro niini nga usa sa tutukan sa ilang buhatan mao ang mga landslide prone area dinhi sa rehiyon labi na ang mga barangay sa kabukiran nga mapalig-on ang ilang komunikasyon matag karon ug unya kun dunay mga dautang panahon nga maabot.

Dugang pa niini nga wala silay kumpiyansa ug kanunay nilang gi-monitor ang dagan sa panahon labi ning pagsige’g uwan diin delikadong dunay mga residente ug mga posibleng dunay mga landslide ug bata nga maanod sa mga sapa.

Subay niini ang mga sakop sa Cebu City Disaster Coordinating Council (CCDC) ang kanunay usab nga nag-monitor matag karon ug unya sa mga kabarangayan dinhi sa dakbayan. – Guam Logroño (BANAT NEWS)