CEBU, Philippines – Ubay-ubay nga mga molupyo sa Slum Improvement Resettlement (SIR) diha sa barangay Mambaling nagpanon sa Cebu City Hall kagahapon sa kabalaka nga sila papahawaon na sa ilang pinuy-anan.
Partikular nga nakigtagbo kang City Administrator Francisco Fernandez mao kadtong mga molupyo nga napakyas pagbayad sa ilang obligasyon.
Apan sa kapin sa dos mil ka pamilya nga maoy orihinal nga benepisyaryo sa programa, giingong sobra sa katunga niini ang napakyas pagtuman sa binuwan nilang bayranan nga P50 lang matag metro kwadrado.
Gusto sa mga residente nga sila mahatagan og lugway sa pagbayad sa ilang obligasyon uban sa pasalig nga sundon ang makab-ot nga kasabutan.
Apan matud ni Fernandez nga kini magdepende na lang unya sa hukom sa mga “policy makers” sa City Hall kung unsa ang desisyon niini. – Elly Bolonos (BANAT NEWS)