PDP-Laban may mga kandidato sa 2010

CEBU, Philippines – Dakong buhi ang Partido ng Demokratikong Pilipino Lakas ng Bayan (PDP-Laban)- ang partido ni kanhi Presidente Corazon Aquino sa dihang misang-at kini sa iyang sertipiko de kandidatura - ug aduna kini dakong papel sa 2010 nga eleksiyon.

Kini ang gipahibalo ni Atty. Aquilino “Koko” Pimentel Jr., anak ni Senador Aquilino “Nene” Pimentel, kinsa dinhi sa Sugbo kagahapon alang sa PDP-Laban Visayas Party Leader Forum nga gipahigayon sa Crown Regency Hotel sa barangay Guadalupe.

Sumala pa ni Pimentel nga nagpadayon ang “inventory” sa partido sa mga aktibong miyembro, samtang padayon sila sa pagpanawag sa mga karaang miyembro aron mobalik pagka-aktibo.

Sa 2010 nga eleksiyon, gihunahunaan nga ituboy sa partido si Mayor Jejomar Binay sa dakbayan sa Makati, uban ang line-up pagka-senador nga sila si Koko Pimentel, Santanina Rasul, Teodoro Locsin, Serge Osmeña nga igsuon ni Mayor Tomas Osmeña. Gikonsiderar usab si Ted Failon, Miriam Defensor-Santiago ug Teodoro Casiño sa Bayan Muna kun magka-uban ang PDP-Laban ug Partido ng Masang Pilipino (PMP) ni kanhi Presidente Joseph Estrada sa United Opposition (UNO).

Dinhi sa Sugbo, silang Ribomapil “Dodong” Holganza ug Kongresista Antonio Cuenco ang nailang mga haligi sa PDP-Laban.

“The marching order is to establish a formal party chapter per municipality. There will be not less than 16,000 car-bearing PDP-Laban party members nationwide,” si Pimentel nagkanayon.

Gitataw ni Pimentel nga kinahanglang mopili kadtong ilang mga kanhi sakop nga tua na sa laing partido kun magpabilin pa kini sa ilang partido o mobalik sa PDP-Laban, sanglit dili mahimo ang duha ka partido.

Mitambong atol sa forum kagahapon ang mga representante sa partido gikan sa isla sa Panay sama sa Ilo-Ilo, Negros Oriental, Negros Occidental, Bohol, Siquijor, Samar, Biliran ug Leyte.

Ang PDP-Laban mo-establisar unya og opisina sa Sugbo ug ipahibalo kini apil na ang mga tinugyanan niini sa dili madugay, si Pimentel nagkanayon.

“We are holding it here in Cebu, among giimbitahan ang mga leaders sa PDP-Laban para mopukaw sa karaang mga miyembro,” si kanhi Kongresista Jun Lozada, presidente sa partido dinhi sa Visayas, nagkanayon. – John Rey Saavedra ug Rey Pasaporte (BANAT NEWS)