CEBU, Philippines - Natusak sa mga samad sa ice pick ang lawas sa usa ka wala hiilhing lalaki human kini tabangi og luba sa lima usab ka wala hiilhing tawo didto sa diskohan sa sitio Libra, barangay Poblacion, dakbayan sa Talisay kagahapon sa kaadlawon.
Ang nahisgutang biktima kinsa gibiyaan sa mga kriminal nga nagbuy-od sa kanal sa daplin sa karsada sa pagtuo nga kini patay na, naagian ni Ricardo Arquiza ug Antonio Millabanco, mga barangay tanod nga nag-roving niadtong higayona, kinsa maoy mipahibawo sa kapolisan sa maong hitabo.
Nasayran nga ang biktima sa wala pa dunggaba, nagsakay og bisekleta ug misulod sa diskohan ug paghuman sa disko sa mga alas 3:00 sa kaadlawon, mipauli usab kini sakay sa iyang bisekleta dihang giatangan sa lima ka tawo sa may dalan Garces ug gitabangan dayon og dunggab, ug dihang nahagbong kini sa kanal gibiyaan ra usab.
Gihatod dayon sa mga tanod ngadto sa tambalanan ang biktima, samtang padayon pa ang kapolisan sa pag-imbistigar sa maong kaso. – BANAT NEWS