CEBU, Philippines - Migara na usab ang panagbangi sa mga gang human lain na usab nga batan-on ang nasamdan sa nahitabong pagpamusil sa eskina sa MJ Cuenco ug Hipodromo nga sakop sa barangay Carreta kagahapon sa kaadlawon.
Ang nasamdan giilang si Kevin Clark Turbo, 19, molupyo sa Gahida St. barangay Hipodromo human pusila sa usa ka giila lang niining Macky uban sa laing walo ka batan-on.
Sa imbestigasyon sa kapolisan, nagbaklay ang batan-on uban sa iyang mga higala nga sila si Joseph Olita, Michael Florentino ug Pablito De Ocampo Jr. sa maong lugar dihang ilang nalabyan ang grupo sa mga batan-on.
Gikatahong dunay usa sa pundok ang milabay og botelya kanila hinungdan nga ilaha kining giduol apan nakugang nalang sila dihang mibunot og armas si Macky dayong pusil sa tampihak ni Turbo.
Ang mga batan-on daling nanagan palayo samtang si Turbo nahagba diha sa dalan ug gidala sa mga kaubanan ngadto sa Chong Hua Hospital ug gihulagway nga talandugon ang kahimtang.
Nagduda ang kapolisan nga mga miyembro sa gang ang mga batan-ong mipusil sa biktima.
Di palang dugay nag-areglo ang mga sakop sa duha ka gangs diha sa barangay Carreta ug misaad nga di mohimo og kagubot sa maong barangay. – BANAT NEWS