CEBU, Philippines - Adunay pagtugot sa mga dagkong politiko sa dakbayan sa Mandaue ang pag-endosar ni Kongresista Nerisa Soon-Ruiz kang Bise Mayor Carlo Pontico Fortuna sa Mandaue aron padaganon pagka-kongresista.
Matud pa ni Fortuna dako ang iyang kalipay sa dihang iyang nasayran nga siya ang giendorsar ni Soon-Ruiz nga padaganon pagka-kongresista sa ika-unom nga distrito sa lalawigan sa Sugbo.
Kini human sa nahitabong panag-estoryahanay sa mga pamilyang Ouano ug Quisumbing nga si Soon-Ruiz gihatagan niini og katungod sa pagpili kun kinsa ang padaganon pagka-kongresista sa distrito.
Gumikan niini, gidawat ni Fortuna ang maong hagit ug kini mipadayag nga andam usab siya sa pagserbisyo sa lungsod sa Consolacion, Cordova ug sa dakbayan sa Mandaue nga maoy naglangkob sa ika unom nga distrito human unya mamahimo nang lone district ang dakbayan sa Lapulapu.
Matud pa ni Fortuna nga igo na kaniya ang iyang kasinatian sa iyang pagserbisyo pagka-konsehal sa dakbayan sa Mandaue sulod sa siyam ka tuig ug pagka-bise mayor sulod sa usa ka termino.
Si Konsehal Noelene Borbajo sa dakbayan sa Mandaue mipadayag sa iyang dakong pag-uyon nga si Fortuna mamahimong kongresista sa distrito.
Sumala pa ni Borbajo nga wala silay mahimo kun sa sunod nga piniliay si Fortuna modagan pagka-kongresista ug mobiya na sa konseho sa dakbayan sa Mandaue bisan pa nga kini aduna pay duha ka termino nga mamahimong bise mayor sa dakbayan sa Mandaue.
Kinahanglan nga dili usikan ni Fortuna ang kahigayonan nga gihatag kaniya ni Soon-Ruiz ug sa mga dagkong politiko sa dakbayan sa Mandaue nga uyon sa pag-endorsar niini sa pagdagan pagka-kongresista. – BANAT NEWS