CEBU, Philippines - Kasong murder ipasaka karong adlawa sa kapolisan sa lungsod sa Borbon batok na sa usa ka manananggot nga nadakpan kagahapon sa hapon human gipatay ang kabit sa iyang asawa ug gihagbong sa langub didto sa Sityo Tabayng Lawon, barangay Candarohan sa nahisgutang lungsod.
Ang suspetsado nga si Cesar Hurca, 44, nadakpan mga alas 11 sa buntag niadtong Sabado atol sa checkpoint sa kapolisan sa dakbayan sa Danao.
Si PO2 Rey Suson, imbestigador sa Borbon Police Station nga gikahinabi sa Banat News nagkanayon nga dali silang nakapadangat og komunikasyon sa kapolisan sa Danao human ang mga nakaalinggat nga si Hurca namaligya sa iyang mga hayopan ug sayo kaayong milarga.
“Dunay nagpahibalo namo didto sa crime scene nga sayong nilayas si Hurca nga gipamaligya ang mga hayupan sa ilang mga silingan kay molarga kini og Leyte ug nisakay sa mini bus,” sumala pa ni PO2 Suson.
Gibutyag niini nga ang mga silingan mitaho sa maong impormasyon human nakit-an ang patay’ng lawas sa biktimang si Renilito Requeso, 49, taga Tayud Lilo-an nga didto na sa langub sa barangay Candarohan.
Matud pa ni PO2 Suson nga gi-hold gilayon si Hurca sa kapolisan sa Danao ug gidala pagbalik sa Borbon Police Station mga alas 5 sa hapon niadtong Sabado.
Hinuon sumala pa niini nga si Hurca wala magmahay sa iyang gihimo sa dihang iyang gidunggab makadaghang higayon si Requeso human matud pa niini gidagmalan na ang iyang asawa.
Ang akusado mitug-an sa kapolisan nga iyang napatay niadtong Biyernes sa alas 9 sa kagabhion si Requeso, human misinggit ang iyang asawang si Necipura, 37, dihang gipugos sa biktima pagdala pagbalik diha sa lungsod sa Consolacion.
Giangkon ni Hurca nga taud-taod nang nagtipon-tipon ang iyang asawang si Necipura ug si Requeso diha sa Consolacion diin ang iyang asawa nanarbaho isip katabang.
Ang akusado mibutyag usab sa kapolisan nga mipauli na ang iyang asawa sa ilang panimalay human magkaaway-away ni Requeso apan bisan pa man niini giapas sa biktima ug iyang naabtan nga naghagkanay sa sulod sa ilang panimalay.
Gumikan kay nadawat niya ang nahitabo sa iyang asawa wala kini niya baldaha. Apan nianang pagkagabii, ang iyang asawa nangayo niya’g panabang gumikan kay gidagmalan ug gibunlot sa akusado aron dalhon sa Consolacion.
Diha-diha iyang gitabang ang iyang asawa ug gidunggab si Requeso sa iyang gidalang screw driver makadaghang higayon ug sa dihang namatay iyang gilabay sa 20 ka tiil nga langub.
Samtang ang iyang asawa nga daling nakabalik sa ilang panimalay iyang gisultihan nga iyang napatay ang biktima hinungdan nga niadtong Sabado sa kadlawon iya kining gipa-una sa paglarga ngadto sa Leyte ug siya misunod na lang pagka-buntag kay gipamaligya pa ang ilang hayopan.
Dugang pa ni Hurca nga bisan paman sa nahitabo sa iyang asawa nga giluiban siya ug biyaan ang ilang mga anak apan pabilin ang ilang maayong relasyon apan sa dihang mipa-uli na kini ug gipasipad-an ni Requeso wala siya kaagwanta pa, hinungdan nga iyang gipatay.