Gitigbas ulo sa panday laksi

CEBU, Philippines – Maayong pagkalaksi sa ulo sa usa ka panday mason human tigbasa og pinuti sa iyang bayaw didto sa barangay Luay, dakbayan sa Toledo niadtong Biyernes sa gabii. Ang biktima mao si Romeo Geoca, 37, minyo, usa ka panday nga taga Luay, samtang ang suspek mao ang iyang bayaw nga si Marcelo Rico, 27, mag-uuma nga silingan ra sa biktima.

Nasayran sa kapolisan sa dakbayan sa Toledo nga nagkalalis ang biktima ug ang suspetsado kay naulaw kuno ang suspetsado kay gipasanginlan kini nga nangamang sa ilang ig-agaw nga babaye. Hinungdan nga gisukmatan sa suspetsado ang biktima kalabot sa maong mga tabi-tabi nga misangpot sa ilang panag-away hangtod nga nagharong sila ug nagsinumbagay.

Apan ang suspetsado nga gilupig sa away, wala makaantos ug milanit sa iyang pinuti ug gitigbas sa ulo ang biktima ug maayong pagkalaksi niini.

Maayo nalang kay nadali sa paghatod ngadto sa Toledo District Hospital ug nasalbar kini, samtang ang akusado mitahan usab dayon sa iyang kaugalingon sa mga barangay tanod sa ilang dapit.

Nagtingkagol na karon sa prisohan ug gipaabot nga pasakaan kini og kaso karong Lunes. – Guam P. Logroño (BANAT NEWS)