Mama nga nagkugos sa 3 ka buwang anak napugngan pag-ambak sa hotel

CEBU, Philippines – Naukay ang mga empleyado ingon man mga guests sa Paragon Suite Hotel human usa ka inahan nga nagkugos sa iyang tulo pa ka buwang masusong anak ang gidudahang mosuway unta og ambak gikan sa 2nd floor sa maong hotel sa dalan Juana Osmeña sa barangay Camputhaw ning dakbayan kagahapon sa hapon.

Si Annie Puden ang supervisor sa nahisgutang hotel nga gikahinabi sa Banat News nagkanayon nga ang gibana-banang 20-anyos nga inahan nga nagkugos sa iyang anak giingong sugod pa alas 4:30 sa hapon nagpatong sa kilid sa 2nd floor ug naghilak.

 Ang maong inahan nga taga Minglanilla giingong mag-anhaan sa maong hotel pagbisita sa amahan sa iyang anak nga 50-anyos nga Briton kinsa diha magpundo sa ilang hotel sukad pa niadtong Mayo 14. Ang mga kawani sa maong hotel lakip na ang uban pang mga guests nagtabang sa pag-agni sa inahan sa pagsulod og balik sa ilang lawak sanglit dyutay nalang matagak na kini diha sa ubos kuyog ang iyang anak.

Nianang mga tungura ang mga hotel staff nagbutang og mga kutson sa gipanglantawang maoy tagakan sa manag-inahan samtang nanawag sila og mga polis nga motabang sa negosasyon.

Dangtan ang kapin sa 30 ka minutos ang polis nga si PO3 Nilo Piedad sa Mobile Patrol Group car 011 sa Cebu City Police Office nga nakasulod sa usa ka gamayng bintana maoy nangurso paglataylatay sa kilid sa bungbong sa maong hotel.

Samtang nagpadayon ang pakig-estorya sa mga langyawng guests ug uban pang mga concern nga mga tawo nakahigayon si Piedad sa paggakos sa manag-inahan ug gitabangan nila kini og pasulod sa bintana.

Ang babaye ug ang bata daling gidala sa Womens Desk aron makapahuway ug matambagan, makita sa dagway sa inahan nga luya kini kaayo ug nihugos ang lawas tungod sa pagpunay og hilak ug gituuhang duna kini dakong suliran.

Mapasalamaton si Puden sa mga langyawng guests sa ilang hotel nga mitabang sa negosasyon samtang nagpaabot sila sa pag-abot sa mga polis Atol sa pagkahitabo wala diha ang langyawng kapuyo sa inahan apan gituuhang duna silay personal nga problema. Ang inahan nga nahinabi sa mga sakop sa media mipadayag nga kagahapon lang siya nakahukom nga maghikog , apan dihang gipangutana sa rason nagdumili na kini sa pagtubag. – Guamittos Logroño (BANAT NEWS)