CEBU, Philippines – Patay ang usa ka 63-anyos nga lolo human kini madasmagi og traysikol nga tangkal-tangkal sa iyahang paglabang sa karsada sa barangay Luray-II siyudad sa Toledo niadtong Huwebes sa alas 7:45 sa gabii.
Ang biktima mao si Bernardino Tribonalo Catagman, 63, molupyo sa barangay Captain Claudio sakop sa nahisgutang siyudad samtang ang nakadasmag niya mao ang traysikol nga kargahanan og mga baboy nga gimaneho ni Carlo Cabanilla, molupyo sa barangay Matab-ang sa maong siyudad.
Matud pa ni SPO1 Lorenzo Mahilum, traffic investigator sa Toledo City Police dihang nahinabi sa Banat News nga ang maong traysikol gikan sa Poblacion Proper paingon sa bus terminal sa Toledo samtang ang biktima naglakaw daplin sa karsada. Pag-abot sa nahisgutang lugar giingong kalit lang milabang ang biktima nga naatol pag-agi sa maong traysikol hinungdan nga kini nadasmagan.
Sumala pa sa kapolisan nalamba sa karsada ug nakaangkon og mga bun-og ug samad sa kalawasan si Catagman hinungdan nga gihatud dayun sa Toledo City District Hospital apan gideklarar kini nga dead on arrival ni Dr. Bonito Sanoria.
Samtang ang drayber sa traysikol boluntaryong mitahan sa kapulisan human sa hitabo ug nagtingkagol na karun sa detention cell samtang giasikaso pa ang kasong ipasaka batok niya. – Darrel Carumba (BANAT NEWS)