Gi-salvage gipasok sa langub

CEBU, Philippines – Usa ka lalaking taga lungsod sa Liloan nga gituohang gi-salvage ug gilabay sa lawom nga langob sa sitio Tabayng Lawom sa barangay Cadarohan lungsod sa Borbon ang nakaplagan sa mga molupyo kagahapon sa alas 10:00 sa buntag.

Ang biktima nailhan sa kapulisan pinaagi sa drivers license nga nakuha gikan sa pitaka niini nga mao si Renilito Doblado Requeso, 49, molupyo sa barangay Tayod lungsod sa Liloan.

Matud pa ni PO2 Rey Suson, imbestigador sa Borbon Police dihang nahinabi sa Banat News nga ang mga molupyo na sa maong lugar maoy mitawag ug nipahibalo kanila kabahin sa patay’ng lawas sa usa ka lalaki nga nakaplagan sa maong langub.

Ang patay’ng lawas napalgan gibana-banang 20 ka tiil gikan sa baba sa maong langub, gituohang diha kini gilabay human patya sa wala pa mailhing mga mamumuno.

Sa gihimong pakisusi sa kapulisan ang biktima dunay daghang samad dinunggaban sa tuong bahin sa dughan ug ingon man sa liog nga maoy hinungdan sa hinanali niining kamatayon.

Subay sa imbestigasyon sa kapulisan usa ka Dizon Novabos, molupyo sa maong lugar maoy unang nakadiskubre sa naglinya nga pat-ak pat-ak nga dugo sa dalan.

Tungod sa iyang kakuryoso, iyaha kining gisundan ug dangtan pila ka tikang sa unahan, usa ka screw driver nga dunay mga dugo ang iyang nakit-an hinungdan nga iyahang gipadayon og subay ang mga dugo hangtud nga miabot siya sa baba sa maong langub gibana-banang 100 metros gikan sa screwdriver.

Dihang iyang gisusi sa ilawom didto niya nakit-an ang nagbuy-od na nga patay’ng lawas sa biktima.

Walay bisan usa sa mga molupyo sa maong lugar ang nakaila sa biktima ug diha pa kini mailhi dihang gikuha ang iyang pitaka ug nabasahan ang drivers license niini ug nahibaw-an nga taga lungsod sa Liloan.

Gituohang gitabangan og dunggab hangtud napatay ang biktima ug pagkahuman gidala sa maong lugar aron ilabay ang patay’ng lawas sa langub aron dili mahibaw-an.

Sumala pang Suson ang biktima gituohang gipatay sa miaging gabii base usab sa kahimtang sa patay’ng lawas niini.

Matud pa ni PO2 Suson padayun pa ang ilang imbestigasyon pagtumbok sa mga suspek ug sa motibo sa krimen sanglit dili man molupyo sa maong lugar ang biktima ug taga lungsod kini sa Lilo-an.

Apan dunay gitug-an kanila ang mga molupyo nga nakamatikod sila sa ilang dapit nga dunay kagubot nga nahitabo nianang pagka-alas 10 sa gabii sa adlaw’ng Biyernes.

Duna nay mga residenteng giimbestigar karon kabahin sa maong impormasyon nga gituohang makatabang sa ilang imbestigasyon pagtumbok sa mga mamumuno.

Ang mga residente na maoy miugkat sa patay’ng lawas sa biktima ug kasamtangang gibutang karon sa punerarya sa lungsod. – BANAT NEWS