Mga Muslim sa Lapu' gidayeg ni Radaza pagpuyo dinhi

CEBU, Philippines – Nagmalampuson ug nagmalinawon ang gihimong simpleng selebrasyon sa ika-111 nga tuig sa kaugalingnan sa nasud sa dakbayan sa Lapulapu diin ang mga Muslim nga namuyo sa dakbayan maoy usa sa nahatagan og atensyon.

Ang maong selebrasyon gitambungan sa mga sakop sa Philippine Air Force, Philippine Navy, PNP sa Lapulapu ug mga kawani sa kagamhanang lokal sa dakbayan sa Lapulapu.

Wala makatambong sa maong kalihukan si Mayor Arturo Radaza apan kini nagbilin og mensahe nga gibasa ni Vice Mayor Mario Amores alang sa mga taga Opon.

Matud pa ni Radaza sa mensahe niini nga ang panaghiusa maoy yawe sa kagawasan sa nasinating krisis sa nasud lakip na ang kagawasan sa sobereniya, kagutom, politikanhong krisis ug krisis sa ekonomiya.

Gumikan niini giawhag ni Radaza ang katawhan nga managhiusa alang sa kalinaw ug kasulbaran sa mga problema sa nasud.

Ang mayor midayeg sa mga Muslim gikan sa Mindanao nga mipili pagpuyo sa Lapulapu aron manginabuhi ug nakatampo pa sa ekonomiya sa maong dakbayan.

Mipasalig usab si Amores nga bukas ang Lapulapu sa mga Muslim nga malinawong mipuyo sa dakbayan.

Lakip sa mitambong sa maong kalihukan ang pipila ka mga lider sa mga Muslim sa dakbayan sa Lapulapu, ang maong mga lider nakatampo sa pagmentinar sa kahapsay ug kalinaw sa ilang pagpuyo diha sa maong lugar. – Bong Soriano (BANAT NEWS)