Late enrolees dawaton-DepEd

CEBU, Philippines – Nagpadayon gihapon ang mga pampublikong mga tunghaan sa dakbayan sa Sugbu pagdawat sa mga late enrolees bisan pa man kun pipila ka semana na nga nagsugod ang klase.

Matud ni City Schools Division Superintendent Lorna Rances nga dili sila makabalibad kun duna kabataan nga ihatod sa mga tunghaan.

“Naa pa man gyu'y mga ginikanan nga wala pa mopadala sa ilang mga anak unya dili man gyud ta kabalibad ani nila,” sumala ni Rances.

Gitataw ni Rances nga samtang wala pa maduso ang form 3 sa mga tunghaan o ang final report sa enrollment, mahimo pa gihapon nga madawat ang mga bata nga moeskwela.

Miingon si Rances nga ang deadline sa submission sa form 3 unya pa sa sunod buwan hinungdan nga padayon pa gihapong gidawat ang mga late enrollees.

Sa kasamtangan, ang Cebu City Schools Division nakatala na og 45,779 ka mga tinun-an sa nagkadaiyang publiko nga mga tunghaan sa high school.

Kini mas ubos og 606 ka enrollees itandi sa mga tinun-an nga mitungha sa sekondarya sa miaging tuig nga miabot og 46, 385.

Ang kapin sa 600 ka mga tinun-an maoy gipaabot sa ilang mga tunghaan nga mobalik sa pag-eskwela sa mosunod nga mga adlaw.

Sa pikas bahin, moabot na usab sa 96,954 ka mga tinun-an sa elementarya ang nalista sa City Schools Division nga mitungha niining tuiga.

Kini mas taas hinuon og 1,967 itandi sa miaging tuig-tingtungha nga duna lay 95,987 ka mga tinun-an ang mi-eskwela sa elementarya.

Gawas sa mga late enrollees miingon si Rances nga ang mga armchairs maoy labaw nilang gikinahanglan sukad sa pagbukas sa klase. – Elly Bolonos (BANAT NEWS)